“Tesla”nın satışları kəskin azalır - Tələb zəifliyi davam edir

“Tesla” 2025-ci ilin ilk rübündə 336 681 avtomobil çatdıraraq ötən ilin eyni dövrü ilə müqayisədə satışlarını 13% azaldıb. 

Valyuta.az xəbər verir ki, bu, şirkət üçün 2022-ci ilin ikinci rübündən bəri ən zəif nəticədir. Aprel ayına dair ilkin göstəricilər isə satış azalmasının davam etdiyini göstərir.

“Tesla” rəsmi olaraq yalnız rüblük satış məlumatları təqdim etsə də, aylıq göstəricilər üçün avtomobil qeydiyyatları əsas götürülür. Bu məlumatlar Avropa bazarlarında ciddi azalma olduğunu ortaya qoyub.

Böyük Britaniyada “Tesla” qeydiyyatları aprel ayında 62% azalaraq cəmi 512 ədəd olub. Almaniyada 46% azalma ilə 885, Fransada 59%, Danimarkada 67%, İsveçdə isə 81% geriləmə qeydə alınıb. Avropadakı satış zəifliyi mart ayındakı mənfi tendensiyanı davam etdirir.

Bəzi analitiklər satış azalmasını “Tesla” rəhbəri İlon Maskın siyasi mövqeyi və prezident Donald Trampa açıq dəstəyi ilə əlaqələndirirlər.

Bundan əlavə, Çin bazarında da zəiflik müşahidə olunub. “Tesla” aprel ayında 58 459 avtomobil satıb ki, bu da ötən ilin eyni dövrü ilə müqayisədə 6%, mart ayına nəzərən isə 25,8% azalmadır.

Çin üzrə ümumi satışlar və ixraclar il ərzində 18,3% azalıb. Rəqiblər – “BYD”, “Nio” və “XPeng” daha ucuz və texnoloji baxımdan cəlbedici modellər təklif edərək bazar payını artırırlar.

Qeyd edək ki, ABŞ bazarına dair aprel məlumatları iyun ayında açıqlanacaq. Şirkət tələbi artırmaq üçün yeni və daha ucuz “Model Y Long Range RWD” modelini 44 990 dollar qiymətlə təqdim edib.

Sərvanə Rəmixanova