“İnvestisiya şirkəti bağlansa, pulunuz batmayacaq”

Azərbaycanda investisiyaların sığortalanmasına başlanılacaq. Bu dəyişiklik investisiya ilə məşğul olanlar üçün maraqlıdır. Bank sektoru ilə müqayisə etsək, əmanətlərin sığortalanmasına qoyulan limit 12% dir. Bəs investisiya bazarında sığortalanma yanaşması deyəndə nə nəzərdə tutulur?

İqtisadçı Xalid Kərimli Valyuta.az-a açıqlamasında bildirdi ki, burada söhbət bizim riskli qərarlarımızın sığortalanmasından getmir: “İnvestisiya şirkətlərinin iş mexanizmi budur ki, investorların pulunu investisiya edir. İnvestisiya şirkəti bizim pulumuzla əmlaka, şirkətlərə, səhmlərə investisiya edir. Sığrotalanmaq odur ki, əgər investisiya şirkətinin başına bir iş gəlsə, qoyulan maliyyə, istiqrazlar, səhmlər və s. batmır. Yaxud ola bilər ki, siz investor olaraq investisiya şirkətindən X səhm alıb, Y şirkətinə yatırım etməsini istəyirsiniz. Amma investisiya şirkəti pulu başqa yerə yönəldir. Bu kimi hallar baş verə bilər ki, investorlar bunu görməsin, dələduzluq halları olsun. Bu halda hökumət investisiya riskini sığortalayır. Yəni söhbət investisiya şirkətləri ilə investorlar arasında olan münasibətlərin sığortalanmasından gedir. İnvestisiya şirkəti hər hansı səbəbdən uğursuzluğa düçar olsa, investorun hüquqları müdafiə olunur. Bu zaman investor rahat şəkildə investisiya şirkətinin idarə etməsinə verdiyi ödənişi geri götürə bilər”.

İqtisadçı bildirib ki, bizim investisiya qərarlarımızın nəticəsi sığortalanmayacaq: “Deyək ki, siz investisiya şirkəti vasitəsilə “Microsoft” şirkətinin səhmini almısınız və onun bazar dəyəri düşdü. Bu zaman artıq sığorta sizə gətirib pul vermir. Bu qərarda məqsəd odur ki, investisiya şirkəti bizə hər hansə problem yaratmasın, investisiyaları investisiya şirkətləri vasitəsilə rahatlıqla edə biləsiniz, onlara güvənəsiniz. Biz investisiya şirkətlərinin bizim tapşırığımıza uyğun hərəkət etdiyindən əmin olmalıyıq. Burada da hökumət zəmanət verir ki, investisiya şirkətlərinə, tapşırıqlara uyğun yerləşdirilmələrin həyata keçməsinə nəzarət edəcək. İnvestisiya şirkətinə investisiya qoyulubsa və birdən investisiya şirkəti ortadan çıxsa yenə də rahat şəkildə investisiyanı geri götürmək mümkün olacaq”.

Sərvanə Rəmixanova