İrəm Çağrı Yılandil: “Trendyol” 50 min satıcı və 20 milyon müştərini birləşdirir"

Hazırda “Trendyol” Türkiyə bazarında 50 min satıcı və 20 milyon müştərini birləşdirir. 5 il əvvəl onlayn pərakəndənin ümumi ticarətdə payı 10% olduğu halda, bu gün göstərici 20%-ə yüksəlib.

Valyuta.az xəbər verir ki, bunu “Trendyol Azərbaycan”ın Beynəlxalq genişlənmə üzrə rəhbəri İrəm Çağrı Yılandil İnmerge İnnovasiya Sammitində çıxışı zamanı bildirib.

O əlavə edib ki, iki il əvvəl beynəlxalq fəaliyyətə başlayan şirkət artıq Səudiyyə Ərəbistanı, BƏƏ, Gürcüstan, Azərbaycan, Sloveniya, Yunanıstan və Bolqarıstan kimi bazarlarda mövcuddur.

İ.Yılandilin sözlərinə görə, Rumıniyada 10-12%, Səudiyyə Ərəbistanında 9%, Mərkəzi Asiyada isə 5-7% olaraq, onlayn pərakəndənin payı hələ də aşağıdır: “Bu rəqəmlər böyük inkişaf potensialına işarədir”.

İ.Yılandil bildirib ki, müştəri etimadını qazanmaq üçün hər bazarda yerli xüsusiyyətlərə uyğun addımlar atılır: “Məsələn, Azərbaycanda “Birbank” ilə birlikdə həyata keçirilən hissəli ödəniş kampaniyaları və bonus proqramları müştəri loyallığını artırır və elektron ticarətin inkişafını sürətləndirir". 

Məhz şirkətin strateji planı da regionda istehlakçı etibarını gücləndirmək və rəqəmsal ticarətin payını artırmaqdır,"- deyə o qeyd edib.