"Ferrari"nin rəhbəri İtaliyanın vergi tələbinə görə bir il ictimai işlərdə işləyəcək

"Ferrari" və "Stellantis" şirkətlərinin İdarə Heyətinin sədri Con Elkann İtaliya hökumətinin vergi tələblərini həll etmək üçün bir il ərzində ictimai işlərlə məşğul olacaq. 

Valyuta.az xəbər verir ki, bundan əlavə, o, qardaşı Lapo və bacısı Cinerva ilə birlikdə İtaliya vergi orqanlarına 183 milyon avro ödəyəcək. Bu barədə "Reuters" məlumat yayıb.

Beləliklə, onlar nənələri Marella Karaççolodan miras aldıqları əmlakla bağlı vergidən yayınma şübhələri üzrə aparılan istintaqı həll etmiş olacaqlar. Sözügedən mirasın dəyəri 800 milyon avro məbləğində qiymətləndirilir.

Con Elkannın hansı ictimai işlərlə məşğul olacağını seçməsi və bunun məhkəmə tərəfindən təsdiqlənməsi gözlənilir. Mümkün variantlar arasında qocalar evlərində və ya narkomaniya ilə mübarizə mərkəzlərində işləmək də var.

Paşa Məmmədli