"Aqrarkredit"in əmlakları 10% endirimlə satışa çıxarılır - QİYMƏTLƏR

15 aprel tarixində “Aqrarkredit” QSC Bank olmayan Kredit Təşkilatının balansında olan bir sıra daşınmaz əmlaklar təkrar hərraca çıxarılacaq. Hərracın ilk hissəsi saat 11:00-da keçiriləcək. Bu mərhələdə iki əmlak satışa çıxarılır.

Valyuta.az xəbər verir ki, bunlardan biri Bakı şəhəri, Nəsimi rayonu, Bəşir Səfəroğlu küçəsi 174 ünvanında yerləşən 493,9 kvadratmetr sahəyə malik qeyri-yaşayış sahəsidir.

Əmlakın start qiyməti 2 430 000 manat, beh məbləği isə 12 150 manat təşkil edir.

Digər əmlak isə Bakı şəhəri, Nərimanov rayonu, Sabit Rəhman küçəsi, ev 68c ünvanında yerləşən fərdi yaşayış evi və torpaq sahəsidir. Torpaq sahəsi 0,014782 hektar, ümumi tikili sahəsi 176,1 kvadratmetrdir. Start qiyməti 495 000 manat, beh məbləği isə 2 475 manatdır.

Eyni gün saat 11:30-da keçiriləcək ikinci hərracda isə ümumilikdə 9 əmlak satışa çıxarılacaq. Siyahıya Bakı şəhərinin Yasamal, Sabunçu, Suraxanı və Xətai rayonlarında yerləşən qeyri-yaşayış sahələri və fərdi yaşayış evi daxildir. Yasamal rayonunda yerləşən qeyri-yaşayış sahəsinin ümumi sahəsi 84,7 kvadratmetr, start qiyməti 213 480 manatdır. Sabunçu rayonu, Bakıxanov qəsəbəsində yerləşən digər qeyri-yaşayış sahəsi isə 68,3 kvadratmetr olub, 31 500 manat start qiyməti ilə təklif olunur.

Suraxanı rayonu, Qaraçuxur qəsəbəsində yerləşən fərdi yaşayış evinin torpaq sahəsi 0,03 hektar, tikili sahəsi 197,8 kvadratmetrdir. Əmlakın start qiyməti 225 000 manatdır. Xətai rayonunda, Çingizxan Kərimov küçəsində yerləşən müxtəlif qeyri-yaşayış sahələri isə 169,3 kvadratmetrdən 230,5 kvadratmetrə qədər dəyişir. Bu əmlakların start qiymətləri 243 900 manatdan başlayaraq 332 100 manata qədər yüksəlir.

Qeyd olunur ki, satışa çıxarılan bütün əmlaklar ikinci dəfə, start qiymətləri 10% aşağı salınmaqla təkrar hərraca təqdim edilir.

Mayya Hüseynova