"CME" 8 aparıcı kriptovalyuta üzrə yeni fyuçers məhsulunu təqdim etdi

Dünyanın ən böyük törəmə maliyyə alətləri və fyuçers birjalarından biri olan "CME Group" Nasdaq ilə birgə yaradılmış kriptoindeks üzrə fyuçers müqavilələrinin ticarətinə başladığını elan edib.

Valyuta.az xəbər verir ki, yeni məhsul “Nasdaq CME Crypto Settlement Price Index” adlı indeksə əsaslanır. İndeksə Bitcoin, Bitcoin Cash, Ethereum, Solana, XRP, Cardano, Chainlink və Stellar Lumens daxil olmaqla ümumilikdə 8 kriptovalyuta daxildir.

Mütəxəssislər bu indeksi kriptovalyuta bazarının ümumi vəziyyətini ölçən əsas göstəricilərdən biri hesab edir. Bazarın ən iri və nisbətən köklü rəqəmsal aktivlərini əhatə edən indeks bəzən kriptovalyuta sektorunun “S&P 500”-ü kimi də xarakterizə olunur.

"CME"nin kripto məhsulları üzrə rəhbəri Giovanni Vicioso bildirib ki, institusional investorlar artıq yalnız bir kriptovalyutaya deyil, daha geniş kriptoaktiv səbətinə çıxış əldə etməyə üstünlük verirlər.

Şirkətin açıqlamasına görə, yeni fyuçers məhsulunun istifadəyə verilməsi məhz institusional investorların artan tələbi fonunda həyata keçirilib.

Qeyd edək ki, son illərdə kriptovalyuta bazarına institusional kapital axınının güclənməsi fonunda fyuçers və digər törəmə maliyyə alətlərinə maraq da sürətlə artır.

Sərvanə Rəmixanova