ABŞ və Çinə qarşı yeni cəbhə: Yaponiyadan 6,3 milyard dollarlıq Al həmləsi

Texnologiya dünyasında süni intellekt (Al) yarışı sürətlənərkən, Yaponiya qlobal səhnədə söz sahibi olmaq üçün iri büdcə ilə hərəkətə keçib. 

Valyuta.az xəbər verir ki, ölkə yalnız xaricdən texnologiya idxal etmək əvəzinə, öz yerli proqram təminatını və infrastrukturunu quraraq rəqəmsal müstəqilliyini təmin etməyi qarşısına məqsəd qoyub. Bu çərçivədə həyata keçiriləcək genişmiqyaslı əməkdaşlıq Yaponiyanı bu sahədə yenidən supergüc mövqeyinə gətirməyi hədəfləyir.

Hökumət mənbələrindən sızan məlumata görə, növbəti beş il ərzində layihəyə təxminən 1 trilyon yen, yəni 6,3 milyard dollar həcmində dəstək paketi ayrılacaq. 2026-cı ilin aprel ayında qüvvəyə minməsi planlaşdırılan bu büdcə ölkənin texnoloji transformasiyasında kritik dönüş nöqtəsi kimi qiymətləndirilir.

Yaradılacaq yeni birgə təşəbbüs sadəcə maliyyə dəstəyi ilə məhdudlaşmır. Layihədə təxminən 10 iri şirkətin iştirakı gözlənilir. Texnologiya nəhəngi "SoftBank" və ölkənin aparıcı süni intellekt startaplarından biri olan "Preferred Networks Inc." daxil olmaqla müxtəlif qurumlardan seçilən 100 yüksək ixtisaslı mühəndis eyni mərkəzdə bir araya gətiriləcək. Bu komanda Yaponiyanın indiyədək ən güclü və əhatəli əsas süni intellekt modelinin yaradılması üzərində çalışacaq.

Yaponiyanın bu addımı qlobal yarımkeçirici böhranlarının və rəqəmsal təhlükəsizlik narahatlıqlarının artdığı bir dövrdə xüsusi strateji əhəmiyyət daşıyır. Ölkə hazırda süni intellekt sahəsində lider mövqedə olan ABŞ və Çinlə arasındakı fərqi azaltmağı planlaşdırır. Milli təhlükəsizliyin gücləndirilməsi və rəqəmsal texnologiyalardakı boşluqların aradan qaldırılması məqsədi ilə qurulan bu tərəfdaşlıq Yaponiyanın gələcək texnoloji yol xəritəsini müəyyən edəcək.

Bu iri investisiyanın nəticələrinin təkcə Yaponiya üçün deyil, qlobal texnologiya balansı baxımından da həlledici rol oynayacağı gözlənilir.

Paşa Məmmədli