8 ayda 9 şirkət alan milyarder CEO: investisiya edərkən nələrə diqqət edir?

1992-ci ildə təsis edilmiş dil və süni intellekt həlləri üzrə fəaliyyət göstərən “TransPerfect” şirkətinin həmtəsisçisi və baş icraçı direktoru Fil Şo son səkkiz ay ərzində doqquz şirkətin satın alınmasına rəhbərlik edib. Milyarder sahibkar  birləşmə və satınalma proseslərində hansı meyarlara üstünlük verdiyini açıqlayıb.

2025-ci ilin yanvar ayından bu yana “TransPerfect” aşağıdakı şirkətləri portfelinə qatıb:

“H2A”, “Technicolor Games”, “Apostroph Group”, “Bear Down Studios”, “Blu Digital Group”, “Speech”, “MPC”, “The Mill Studios” və “Unbabel”.

Fil Şonun sözlərinə görə, şirkətlərin alınması “TransPerfect”in əsas strategiyasının mərkəzində dayanır, lakin bu proses klassik investisiya fondlarının yanaşmasından köklü şəkildə fərqlənir.

“Biz şirkətləri alıb işçiləri ixtisar edən, yalnız mənfəəti artırmağa çalışan özəl investisiya fondları kimi davranmırıq. Əgər komanda uyğun deyilsə, həmin sövdələni ümumiyyətlə etmirik”, – deyə Fil Şo bildirir.

Sahibkar ruhlu idarəetmə komandası

Fil Şoya görə, investisiya qərarında ən vacib meyar sahibkar düşüncəsinə malik rəhbərlikdir.

“Sahibkarlarla işləməyi sevirəm, çünki onlar tez və düzgün qərar verə bilirlər. Eyni zamanda səhv etdiklərini başa düşəndə kursu dəyişməkdən çəkinmirlər.”

“TransPerfect”in məqsədi belə rəhbərləri şirkətə cəlb edərək onların biznesini holding daxilində daha da böyütməkdir. Şirkətin təqdim etdiyi əsas üstünlük isə inzibati yükün azaldılmasıdır:

“Siz bu biznesi mühasibatlıqla məşğul olmaq üçün qurmadınız. Arxa ofis işlərini biz görək, siz isə müştərilərlə işləyin, texnologiya yaradın və satışa fokuslanın.”

Satınalmadan sonra rəhbərliyin qalması

“TransPerfect” üçün əsas şərtlərdən biri də təsisçilərin və ya yüksək vəzifəli menecerlərin şirkətdə qalmasıdır.

Fil Şo bildirir ki, əsas məqsəd işçilərin böyük hissəsini qorumaq və mövcud insan kapitalını inkişaf etdirməkdir:

“Biz əslində şirkət almırıq, komandaları və texnologiyanı alırıq.”

Maraqlıdır ki, “TransPerfect” daxilində bu proses “satınalma” adlandırılmır. Şirkət rəhbərliyi tərəfləri “birləşmə tərəfdaşı” kimi təqdim edir.

Əvvəllər yalnız təsisçi rəhbərliyində olan şirkətlər nəzərdən keçirilirdisə, indi müəyyən hallarda menecmenti dəyişmiş bizneslər də dəyərləndirilir.

“TransPerfect” texnologiyasından istifadə edən şirkətlər

Fil Şonun sözlərinə görə, alınan şirkətlərin minimum tələbi “TransPerfect”in texnologiya platformalarına keçid etməsidir.

“Biz öz texnologiyamız varkən rəqiblərin sistemlərinə pul ödəmək istəmirik. Bazarda lider texnologiyalarımız mövcuddur.”

Bu dəyişiklik əsasən mühasibatlıq və dil texnologiyası sistemlərini əhatə edir, gündəlik əməliyyatlara ciddi təsir göstərmir.

Satıla bilən və bazarda dəyər yaradan məhsul

Əgər mövcud satış komandası məhsulu sata bilmirsə, həmin biznes investisiya baxımından cəlbedici sayılmır.

Fil Şo vurğulayır ki, “TransPerfect” şirkətləri yalnız gəlir və ya brend adı üçün almır:

“Biz özəl şirkətik. Kiməsə artım göstərmək məcburiyyətimiz yoxdur. Məqsədimiz müştərilər üçün dəyər yaradan güclü biznes qurmaqdır.”

Biznesi şaxələndirən şirkətlərə üstünlük

Şirkət portfelinin diversifikasiyası da əsas meyarlardan biridir. Eyni sahədə fəaliyyət göstərən bizneslər yalnız yeni bazar təqdim edərsə maraq doğurur.

Məsələn, “TransPerfect”:

film və striminq paylanması üzrə ixtisaslaşmış “Blu Digital Group”u,

vizual effektlər sahəsində lider olan “MPC” şirkətini (o cümlədən “Dracula” filmi üzərində işləyib) satın alıb.

Bundan əlavə, müxtəlif zaman qurşaqlarında fəaliyyət göstərən şirkətlərin alınması “TransPerfect”ə 24 saat fasiləsiz istehsal imkanı yaradır:

“Günəş bizim biznes üzərimizdə heç vaxt batmır. Bu, ABŞ-da çalışan komandamıza əlavə yük salmadan müştərilərə sürətli xidmət göstərməyə imkan verir.”

Tənzilə Ağabalayeva