Süni intellekt Avropa banklarında 200 min iş yerini risk altına salır

Avropa bankçılıq sektoru süni intellektin və rəqəmsallaşmanın sürətlənməsi fonunda yaxın illərdə ciddi ixtisar riski ilə üz-üzə qala bilər.

Valyuta.az xəbər verir ki, Morgan Stanley tərəfindən aparılan təhlilə əsasən, Avropanın aparıcı bankları 2030-cu ilə qədər işçi qüvvəsinin təxminən 10%-ni, yəni 200 mindən çox vəzifəni ixtisar etməyi planlaşdırır.

Analiz göstərir ki, süni intellekt və avtomatlaşdırma ən çox arka ofis, orta ofis, risklərin idarə olunması və uyğunluq (compliance) bölmələrində çalışan işçilərə təsir edəcək. Banklar bu sahələrdə avtomatlaşdırma hesabına 30%-ə qədər məhsuldarlıq artımı əldə etməyi hədəfləyir. Fiziki bank filiallarının bağlanması və xidmətlərin onlayn kanallara keçməsi də prosesi sürətləndirən əsas amillər sırasındadır.

Araşdırmaya daxil edilən 35 iri Avropa bankında hazırda ümumilikdə 2,12 milyon nəfər çalışır. İşçi sayının 10% azalması isə təxminən 212 min nəfərin işini itirməsi deməkdir. Qeyd olunur ki, Avropa bankları ABŞ bankları ilə müqayisədə daha aşağı gəlirliliklə üzləşdiyi üçün uzun müddətdir xərclərin azaldılması təzyiqi altındadır və süni intellekt bu baxımdan əsas alətlərdən biri kimi ön plana çıxır.

Bununla yanaşı, bəzi bank rəhbərləri süni intellektin həddindən artıq sürətlə tətbiqinin risklərinə də diqqət çəkir. Xüsusilə gənc əməkdaşların əsas bankçılıq bacarıqlarını tam mənimsəmədən sistemdən kənarlaşdırılmasının uzunmüddətli perspektivdə sektor üçün mənfi nəticələr yarada biləcəyi vurğulanır.

Ekspertlərin fikrincə, bu proses Avropa bankçılığında yalnız texnoloji deyil, struktur dəyişikliklərinin də başlanğıcıdır və qarşıdakı illərdə həm xərclər, həm də məşğulluq balansı köklü şəkildə dəyişə bilər.

Sərvanə Rəmixanova