24 yaşlı startapçı "Meta"nın ən yaxşı süni intellekt mütəxəssislərini "oğurlayır"

Stenford Universitetinin aspiranturasını yarımçıq qoyan 24 yaşlı Karlina Honq süni intellekt (Al) üzrə aparıcı tədqiqatçıları “Meta”dan özünün “Axiom Math” startapına cəlb edib. Şirkət riyazi Al üzərində çalışır.

Valyuta.az xəbər verir ki, bu barədə “Business Insider” yazıb.

Mart ayında təsis edilən startap yaxın zamanda ilkin investisiya raundunda 64 milyon dollar vəsait topladığını açıqlayıb. Cəmi 17 əməkdaşı olan şirkət “Meta”nın fundamental Al araşdırmaları bölməsi “FAIR”, “GenAI” komandası, eləcə də “Google Brain”in keçmiş mütəxəssislərini komandaya gətirməyi bacarıb.

Honq uğurlu işə qəbul prosesini belə izah edib: "Tapşırıq kifayət qədər çətin olduqda, istedadların sıxlığı çox yüksək olur və bu, sizi başqa böyük zəkalar üçün cazibə mərkəzinə çevirir".

O qeyd edib ki, “Axiom”a qoşulan tədqiqatçıların bir çoxu riyazi super intellekt probleminin həllini öz əsas peşəkar irsi kimi görür.

“Meta”dan startapa keçən əsas şəxslər arasında şirkətin ilk əməkdaşı və hazırkı texniki direktoru Şubxo Senqupta da var. Honq onu təsadüfən bir kofedə qarşılayıb. Həmçinin Fransua Şarton, Aram Markosyan və Hyu Lader də komandaya qoşulan mütəxəssislər arasındadır.

İT sahəsi mütəxəssislərindən əlavə, Honq özünün keçmiş professoru, tanınmış riyaziyyatçı Ken Ononu da startapa cəlb etməyə nail olub. Startapın qurucusu şirkətdə yaşa və iyerarxiyaya fikir vermədiyini, “ieryeraxiyasız” bir iş mühiti yaratmağa çalışdıqlarını bildirib.

“Axiom Math”ın missiyası sırf riyaziyyatdan daha genişdir. Honqun sözlərinə görə, onların texnologiyasının kommersiya tətbiqləri proqram təminatının və aparat sistemlərinin verifikasiyasından tutmuş maliyyə və kriptoqrafiyaya qədər, sübut olunmuş şəkildə düzgün məntiqi nəticə tələb olunan bütün sahələri əhatə edə bilər.

Paşa Məmmədli