Yay aylarında Dubayda istirahətin Türkiyədən ucuz olmasının səbəbləri nələrdir?

Xarici ölkələrə turla səfər edən zaman insanların əsas fikir verdiyi məqamlardam biri də qiymət məsələsidir. Seçim edən zaman qiymət faktoru əsas rol oynayır. Ən çox üz tutulan xarici turlar arasında əsasən Türkiyə çoxluq təşkil etsə də, son zamanlar Dubaya da tur ilə səyahət edənlər kifayət qədərdir. Amma Dubay ilə Türkiyəni müqayisə edən zaman Türkiyəyə təşkil olunan turların qiyməti daha bahadır.

Maraqlıdır, Türkiyəyə təşkil olunan turların qiymətinin baha edən amillər hansılardır?

Valyuta.az-a danışan bloger, turizm eksperti Azər İsmayıl bildirdi ki, hazırki zamanda Türkiyədə istirahət etmək üçün ən bahalı vaxtdır. Dubayda isə ucuz zamandır:

“Çünki Dubayda hava bu aylarda çox isti olur və insanlar ora səyahət etməkdən çəkinirlər. Dubayda hava çox isti olduğu, insanların günorta vaxtlarında şəhərə çıxa bilmədiyi üçün onun yerinə Türkiyəyə səyahət etməyə üstünlük verirlər”.

Ekspert deyir ki, ilk öncə biz səfər edəcəyimiz şəhəri müəyyən etməliyik. Əgər səyahət edəcəyimiz şəhərlər Türkiyənin Antalya və ya İstanbul şəhəridirsə, bunlar iki fərqli seqmentlərdir:

“Antalyada hotellər, adətən, hər şey daxil sistemi ilə çalışır. Bu da, digər sadəcə səhər yeməyi verən və ya yemək verməyən şəhər hoteli ilə müqayisədə baha ola bilər. Çünki burada xərclər, personal və s. çoxdur. Amma şəhər hotellərində isə daha az resurs, daha az maliyyə sərf olunur deyə qiymətlər ucuz olur. Dubayda da hotellərin çoxu şəhər hotelləridir. Yəni, sadəcə səhər yeməyi verirlər və bəzi hallarda isə yalnız hotel otağı verirlər. Buna görə də, Dubayda hotellərin qiymətinin daha ucuz olması ehtimalı var”. 

A.İsmayılın sözlərinə görə, ümumiyyətlə, Dubaya olan tur səfərləri uzun müddətdir təşkil olunur. Əvvəllər qiymət dollar ekvivalentində daha ucuz idi. Bəzi hallarda 200-250 dollara turlar olurdu. Hazırda bütün dünyada qiymətlər dəyişdiyi üçün Dubayda da qiymətlər dollar ekvivalentində qalxıb.

Əvəz Həsənov