2022-ci ilin yanvar-iyul ayları ilə müqayisədə cari ilin müvafiq dövründə xarici ölkələrə gedən Azərbaycan vətəndaşlarının ümumi sayı 19,8 faiz artaraq 993,5 min nəfər olub. 

Dövlət Statistika Komitəsinin məlumatına görə, Rusiyaya gedən Azərbaycan vətəndaşlarının sayı 1,6 dəfə, Gürcüstana gedənlərin sayı 32,5 faiz, Türkiyəyə gedənlərin sayı 6,4 faiz artıb, İrana gedənlərin sayında isə 24,7 faiz azalma baş verib. 

İqtisadçı ekspert Natiq Cəfərli Valyuta.az-a açıqlamasında bildirib ki, xarici ölkələrə gedən soydaşlarımızın əsasən Rusiyaya axın etməsi həmin istiqamət üzrə hava reyslərin sayının 2,5 dəfə artması ilə bağlıdır:

“Xaricə gedənlərin sayında 20 faizlik artımın olması o qədər də böyük rəqəm deyil. Quru sərhədləri açıq olsaydı, bu artım daha çox olardı. Buna baxmayaraq, xarici ölkələrə gedən vətəndaşlarımızın sayında artım baş verib. Bu da hava daşımaları üzrə reyslərin sayında ciddi artımların olması ilə bağlıdır. Bu reys artımı özünü əsasən də Rusiya istiqamətində göstərib. Tək Rusiya istiqaməti üzrə hava reyslərinin sayı 2,5 dəfə artıb. Həftədə 28-29 reys həyata keçirilir ki, bu da kifayət qədər çoxdur. Reyslərin sayının və hava məkanı üçün açılan şəhərlərin sayının artımı müvafiq olaraq gedənlərin sayının da artımına təsir göstərib”. 

Ekspertə görə, İrana gedinlərin sayında azalmanın olması da təbii və gözlənilən idi: 

“Ora bir tək Tehran reysi işləyir. Zaman-zaman orada da müəyyən problemlər yaşandı. Səfirliyimizə hücumdan sonra oradakı konsulluq fəaliyyətimiz də haqlı səbəblərdən donduruldu. Habelə, İrana getməməklə bağlı Azərbayan hökumətinin çağırışı da oldu”. 

Ramiz