Kimin müavinəti nə qədər artırıldı?

Xəbər verdiyimiz kimi, Prezident İlham Əliyev sosial müavinətlərin, Azərbaycan Respublikası Prezidentinin təqaüdlərinin və fəxri adlara görə təqaüdlərin məbləğlərinin artırılması və bununla əlaqədar Azərbaycan Respublikası Prezidentinin bəzi fərmanlarında və Sərəncamında dəyişiklik edilməsi haqqında Fərman imzalayıb.

Valyuta.az hansı sosial müavinətin nə qədər artırıldığı barədə məlumatları təqdim edir:

Orqanizmin funksiyalarının 81–100 faiz pozulmasına görə əlilliyi müəyyən edilmiş şəxslər əvvəl 270 manat alırdısa, indi bu məbləğ 300 manat təşkil edir.

Orqanizmin funksiyalarının 61–80 faiz pozulmasına görə əlilliyi müəyyən edilmiş şəxslərin müavinəti isə 220 manatdan 250 manata, orqanizmin funksiyalarının 31–60 faiz pozulmasına görə əlilliyi müəyyən edilmiş şəxslərin sosial müavinətinin məbləği isə 150 manatdan 180 manata qaldırılıb.

Ailə başçısını itirməyə görə sosial müavinətin məbləği 120 manatdan 140 manata yüksəldilib.

Bir yaşınadək uşağı olan aztəminatlı ailələrə sosial müavinətin məbləği hər uşaq üçün əvvəl 100 manat idisə, indi bu məbləğ 140 manat təşkil edir.

Vətən Müharibəsi Qəhrəmanları əvvəl 2000 manat təqaüd alırdı, indi bu məbləğ 2200 manata yüksəldilib.

Milli Qəhrəmanlar üçün verilən təqaüdün məbləği isə 1800 manatdan 2000 manata qaldırılıb.

Qeyd edək ki, bu təqaüdlər ölümündən sonra verildikdə və ya həmin ad verilmiş şəxs sonradan vəfat etdikdə həmin şəxsin ailə üzvlərinə (təqaüd məbləği onların sayına bərabər məbləğdə bölünməklə) ödənilir.

Şəhid ailəsi üçün müvainətin məbləği isə 100 manat artırılaraq 700 manat təşkil edilib. Bu təqaüd 2007-ci ildən verilir. 20 Yanvar şəhidinin ailəsi üçün də məbləğ eyni təşkil edir.

Bunadək Xalq artisti, Xalq şairi və Xalq rəssamı 200 manat təqaüd alırdısa, indi bu məbləğin miqdarı 300 manatdır. Əməkdar elm xadimi, əməkdar incəsənət xadimi, əməkdar artist, əməkdar rəssam, əməkdar mədəniyyət işçisi, əməkdar müəllim, əməkdar həkim, əməkdar memar, əməkdar bədən tərbiyəsi və idman xadimi, əməkdar dövlət qulluqçusu, əməkdar jurnalist, əməkdar mühəndis, əməkdar hüquqşünas, əməkdar kənd təsərrüfatı işçisi, əməkdar pilot, əməkdar tibb işçilərin müavinəti isə 150 manatdan 200 manata yüksəldilib.

Dəfn və doğum pulu kimi adlandırılan müavinətlərin məbləği isə 100 manat artırılaraq 600 manat təşkil edib.

©Qafqazinfo