İsti yay havalarında dondurmalar əvəzolunmazdır. Ancaq bəzi dondurmalar var ki, onları yemək sizi sərinlətsə də, qiymətini bilmək sizi qızdıracaq. Onlardan biri də "Byakuya" adlı dondurmadır. Əgər bu dondurmanı yeməyi düşünürsünüzsə, diqqətli olun, bir qaşıq belə bəlkə də bir neçə ilin yayında yeyəcəyiniz bütün dondurmalardan baha başa gələ bilər.

Valyuta.az xəbər verir ki, Yaponiyanın premium dondurma brendi "Cellato" tərəfindən hazırlanan və nadir ağ trüf ilə sake mayasının birləşməsindən ibarət olan "Byakuya" adlı dondurma "Guinness Dünya Rekordları"na əsasən dünyanın ən bahalı dondurması elan edilib. Bu lüks desertin bir porsiyası 873.400 yen (təxminən 6.696 ABŞ dolları) dəyərində qiymətləndirilir. 

Dünyaca tanınan inqrediyentlərlə hazırlanıb

Bu dondurma Avropa və Yapon mətbəxlərinin nadir inqrediyentlərini birləşdirən qeyri-adi bir kulinariya təcrübəsidir. "Byakuya" dondurmasının əsas komponenti İtaliyanın Alba şəhərindən gətirilən nadir ağ trüf göbələyi dünya üzrə ən bahalı qida məhsullarından biri hesab olunur. Bu inqrediyentin 1 kiloqramı 15.000 dollardan baha ola bilər. 

Dondurmanın tərkibinə, həmçinin İtaliyanın məşhur və uzunmüddətli yetişdirilən "Parmigiano Reggiano" pendiri və Yaponiyada sake istehsalı zamanı əldə olunan “sake lees” adlı xüsusi fermentasiya məhsulu da daxildir. Bu inqrediyentlər desertə əlavə dərinlik və umami dadı qatır.

1,5 illik kulinariya araşdırması

"Byakuya"nın hazırlanması sıradan bir mətbəx sınağı olmayıb. "Cellato" Osakada yerləşən və fransız-yapon mətbəxi üzrə tanınan "RiVi" restoranının baş aşpazı Tadayosi Yamada ilə əməkdaşlıq edib. Bu unikal desertin inkişaf etdirilməsi üçün 1,5 ildən çox müddət ərzində dad balansı, inqrediyentlərin seçimi və texniki incəliklər üzərində çalışılıb.

Aşpaz Yamada bildirib: “Biz bu desertdə Yapon və Avropa kulinariya ənənələrinin ən yaxşı cəhətlərini bir araya gətirməklə lüksün zirvəsini əks etdirmək istədik”.

Çoxhissəli təcrübə

"Byakuya" təkcə dad üçün deyil, həm də duyğular üçün nəzərdə tutulmuş təcrübədir. Hər porsiya zərif qara qabda təqdim olunur və əl işinə aid xüsusi metal qaşıqla birlikdə verilir. Şirkət bildirir ki, məhsul yalnız dad deyil, həm də ətir, tekstura və vizual baxımdan qlobal dad dünyasına yeni baxış gətirir.

Qlobal kulinariya nailiyyəti

Məhdud sayda satışa çıxarılan bu desert və əldə etdiyi dünya rekordu ilə "Byakuya" artıq lüks desert sevərlər və qastronomiya həvəskarlarının diqqətini cəlb edib. "Cellato"nun sözçüsü bu deserti “kulinariya sənətinin təkamülünə sübut” kimi xarakterizə edərək Yaponiyanı innovativ qastronomik ustalığın ön cərgəsinə çıxardığını bildirib.

Sərvanə Rəmixanova