Müasir biznes mühitində uğurun əsas şərtlərindən biri güclü liderlikdir. Artıq yalnız idarəetmə bacarığı kifayət etmir. Şrkətləri irəli aparan, dəyişiklik yaradan, insanlara təsir göstərən və gələcəyə yönəlik düşünənlər lider ola bilir.

Beynəlxalq səviyyədə tanınan strateji məsləhətçi Martin Roll-un yanaşmasına görə, liderlik doğuşdan gələn qabiliyyət deyil. Əksinə, bu təcrübə müşahidə və öz üzərində işləməklə qazanılan bir bacarıqdır. Əsl lider olmaq üçün isə insan ilk növbədə özü ilə dürüst olmalı, bəzi sualları özünə verməli və cavab axtarmalıdır.

Valyuta.az həmin sualları təqdim edir:

Gələcəyə fokuslana bilirsinizmi?

Əsl lider bu günü deyil, sabahı düşünür. Texnologiyanın sürətli inkişaf etdiyi dövrdə yalnız cari problemləri həll etməklə kifayətlənmək olmaz – liderlər gələcək imkanları öncədən görüb addım atırlar.

Dəyişiklikdən qorxursunuz, yoxsa onu qəbul edirsiniz?

Liderlər status-kvonu qorumağa deyil, onu dəyişməyə çalışırlar. Onlar çətin qərarlar verməkdən çəkinmir, təşəbbüsü ələ almağa hazır olurlar.

Riskləri fürsət kimi görürsünüzmü?

Qətiyyətli liderlər qeyri-müəyyənlikdən qorxmur, əksinə, onu inkişaf üçün bir şans kimi qiymətləndirirlər. Onlar uğursuzluqlardan dərs alaraq növbəti dəfə daha güclü çıxış edirlər.

Aydın məqsədiniz varmı?

Liderin dəyərləri və məqsədi nə qədər aydın olsa, ətrafındakıları da o qədər asan ruhlandıra bilər. Bu aydınlıq həm də liderin qərarlarında ardıcıllıq yaradır.

İdarəetmə bacarıqlarınız yetərlidirmi?

Yalnız vizion sahibi olmaq kifayət etmir. Lider həm də real planlar qurmalı, işi düzgün bölüşdürməli və komandasını idarə edə bilməlidir.

İnsanlarla münasibətiniz necədir?

Liderlik insanlarla düzgün əlaqə qurmaqdır. Empati, dinləmə və fərdi yanaşma bacarığı liderin komandasını arxasınca aparmasına imkan yaradır.

Komanda üzvlərini təşviq edir, onları inkişaf etdirməyə çalışırsınızmı?

Əsl lider başqalarının da liderliyini formalaşdırır. Onlara etibar edir, öyrənməyə şərait yaradır və onların uğuruna sevinir.

Fədakarlıq göstərirsinizmi?

Lider olmaq diqqəti öz üzərinə deyil, komandanın uğurlarına yönəltmək deməkdir. Liderlər üçün əsas olan, nəticənin kimə aid olması deyil, nəticənin əldə olunmasıdır.

Yeni fikirlərə və fərqli baxışlara açıqmısınız?

İnnovasiya və inkişaf yalnız açıq fikirli mühitdə mümkündür. Liderlər komandalarını danışmağa təşviq etməli və müxtəlif fikirləri dəyərləndirməlidirlər.

Ətrafınızda sevilən birisinizmi?

Sevilmək liderin etibar qazanmasında vacib rol oynayır. Səmimi münasibətlər, dürüstlük və dəstəkverici davranış komanda ruhunu gücləndirir.

Sərvanə Rəmixanova