Bu gün internetdən istifadə sadəcə bir seçim deyil, həm də gündəlik həyatımızın ayrılmaz bir hissəsinə çevrilib. Onlayn alış-verişdən internet bankçılığa, sosial mediadan uzaqdan təhsilə qədər hər bir fəaliyyətimiz şəxsi məlumatların ötürülməsini tələb edir. Məhz buna görə də Wi-Fi şəbəkəsinin təhlükəsizliyi həm şəxsi məlumatların qorunması, həm də fasiləsiz və sabit internet bağlantısı baxımından həyati əhəmiyyət daşıyır.

Təəssüf ki, zəif qorunan və ya düzgün ayarlanmayan bir Wi-Fi şəbəkəsi kənar şəxslər üçün asan hədəfə çevrilə bilər. Belə hallarda şəxsi məlumatların oğurlanması, internet sürətinin azalması, hətta hüquqi məsuliyyət doğura biləcək fəaliyyətlərin sizin şəbəkəniz vasitəsilə həyata keçirilməsi mümkündür.

Xoşbəxtlikdən, bu cür risklərin qarşısını almaq üçün bahalı proqram təminatlarına və ya dərin texniki biliklərə ehtiyac yoxdur. Sadəcə yönləndiricinizdə (router) edəcəyiniz bir neçə sadə, lakin təsirli ayar dəyişiklikləri ilə Wi-Fi şəbəkənizi icazəsiz girişlərdən yəni, sizin icazəniz olmadan bağlantınıza qoşulmağa çalışan şəxslərdən qorumaq mümkündür.

Valyuta.az bu yazıda Wi-Fi şəbəkənizi qorumaq üçün etməli olduğunuz 5 sadə məsləhəti təqdim edir.

Yönləndiricinizin standart giriş məlumatlarını mütləq dəyişin

Wi-Fi təhlükəsizliyini artırmağın ilk addımlarından biri, yönləndiricinizin standart administrator istifadəçi adı və parolunu dəyişməkdir.

Əksər modemlər internetdə asanlıqla tapıla bilən ümumi istifadəçi adı və parollarla gəlir. Bu səbəbdən unikal istifadəçi adı və güclü parol yaratmaq, icazəsiz girişin qarşısını almaqda mühüm rol oynayır.

Şəbəkə şifrələnməsini aktiv edin və WPS funksiyasını söndürün 
Wi-Fi şəbəkənizdə WPA2 və ya WPA3 kimi güclü şifrələmə standartlarının aktiv edilməsi məlumatlarınızı qorumaq üçün vacibdir.

Bundan əlavə, Wi-Fi Qorunan Qurulum (WPS) funksiyası zəifliklərə malik olduğu üçün hakerlər tərəfindən istifadə oluna bilər. Bu səbəbdən yönləndiricinizin ayarlarında həmin funksiyanı söndürmək şəbəkənizin təhlükəsizliyini artırar.

Qonaq şəbəkəsi yaradın və yenilənmələri nəzərə alın

Qonaqların əsas şəbəkənizdəki həssas cihazlara çıxış əldə etmədən internetdən istifadə edə bilməsi üçün ayrıca qonaq şəbəkəsi yaratmağınız tövsiyə olunur.

Eyni zamanda, təhlükəsizlik təhdidlərinə qarşı qorunmaq və yönləndiricinizin performansını yaxşılaşdırmaq üçün istehsalçının təqdim etdiyi proqram təminatı yeniləmələrini mütəmadi yoxlayıb quraşdırmaq çox vacibdir.

Günay