Bir çox brendlər bu gün brend təqlidi tələsinə düşür. Yəni, böyük və uğurlu brendlərə baxaraq, onların addımlarını təkrarlamaqla uğur qazanacaqlarını düşünürlər. 

Valyuta.az xəbər verir ki, bugünkü iş dünyasında, xüsusən də süni intellektin (AI) təsiri ilə etibarın azalması fonunda, fərqli və autentik brend kimliyinin yaradılması heç vaxt indiki qədər vacib olmayıb.

Hər hansı bir kampaniyanın və ya taktikanın başqa birisi üçün işləməsi, mütləq sizin üçün də işləyəcəyi mənasına gəlmir. 

"Just Do It" şüarı 

Məsələn, “Nike” şirkətinə baxaq. Onların sadə "Just Do It" şüarı dünya miqyasında tanınır. Bu gün bu şüar uğur qazanıb, çünki “Nike” artıq böyük və sadiq bir müştəri bazasına və güclü brend mövqeyinə malikdir. Bu ifadəni tanıyırıq və bəyənirik.

"Just Do It" həm də Gary Gilmore adlı qatilin məşhur son sözlərinə əsaslanaraq populyarlıq qazanıb. Şirkət o zaman mədəni cəhətdən aktual olan bu ifadəni götürüb, onu müsbət və hər kəsin anlaya biləcəyi bir şeyə çevirdi.

Ona görə də, nəyisə təqlid edərək nəticə almadığınız zaman təəccüblənməyin. Ya mədəni aktuallığa malik güclü bir məhsula, ya da artıq tanınmış bir brendin böyük auditoriyasına ehtiyacınız var. Startapsınızsa, hələ sübut etməli olduğunuz daha çox şey var. Bu, öz mövqeyinizi müəyyənləşdirməyi və brend təqlidi tələsindən uzaq durmağı daha da vacib edir.

Orijinallıq brend quruculuğunda daha əhəmiyyətli olur

Brend olaraq orijinal olmaq ən vacib cəhdlərdən biridir. Əgər şirkət olaraq orijinal yaşayırsınızsa və ona inanırsınızsa, zamanla sizə dəyər verən, sizi dəstəkləyən və sizin üçün səylərini əsirgəməyən sadiq bir icma yarada bilərsiniz. Bu, həm şirkətinizə, həm də brendinizə inam qazanmağa kömək edir. Beləliklə, özünüz olun!

Başqa bir məqam: Süni intellektin və dezinformasiyanın yayılması ilə cəmiyyət artıq şirkətlərdən çox fərdlərə etibar edir. Buna görə də, səylərinizi əvvəlcə etibarlı, həqiqi liderlər yaratmağa yönəldin. Bu etibar zamanla brendinizə də keçəcək.

Orijinal brend qurmaq asan deyil

Burada sizə bəzi tövsiyələr var:

Kiçik bir ideyadan başlayın: Platformanızı unikal və ya xüsusi bir mövqeyə əsasən qurmağa başlayın. Hər kəsin haqqında danışmadığı bir mövzuda danışmaq sizi fərqləndirəcək və auditoriya ilə etibar qurmağınıza kömək edəcək.

Müştərinizi daha yaxşı tanıyın: Müştəri hər zaman haqlıdır. Bunu unutmamaq lazımdır. Dar bir mükəmməl müştəri profilinə diqqət yetirin və onların problemlərinə və fürsətlərinə yaxın olun.

Uzunmüddətli düşünün: Etibar qurmaq bir marafondur. Qısamüddətli yanaşma sizi yoldan çıxara bilər. Uzunmüddətli nəticələr üçün zəruri işləri indi görün.

Uğuru ölçün: Performansınızı müştəri sorğuları və metriklər vasitəsilə izləyin. Yalnız keyfiyyətli rəylərə yaxın duraraq daha tez uyğunlaşa bilərsiniz.

Maya Hüseynova