“Google” ABŞ-da 600 sürücüsüz taksi ilə xidmət göstərən “Waymo”ya əlavə 5 milyard dollar sərmayə qoyacağını aşıqlayıb.

Valyuta.az xarici mediaya istinadən xəbər verir ki, son illərdə sürücüsüz nəqliyyat vasitələri texnologiyasını inkişaf etdirən şirkətlərin sayı xeyli artıb. Bu şirkətlərdən biri, gələcəkdə tamamilə sürücüsüz robot taksi xidməti təqdim etməyi planlaşdıran “Waymo” şirkəti yeni sərmayə alıb.

Sürücüsüz taksilərə ən böyük investorlardan biri olan “Google” öz şirkətinə daha 5 milyard dollar sərmayə qoyub. “Google”un investisiyası “Waymo”nun robotaxi xidmət şəbəkəsini genişləndirməyi planlaşdırdığı xəbərindən sonra gəlir.

Avtonom sürücülük proqramı təqdim edən “Waymo” hazırda ABŞ-ın San Fransisko, Feniks və Los-Anceles şəhərlərində istifadəçilərə sürücüsüz taksi xidmətləri təqdim edir. Bu ilin sonunda Texasın paytaxtı Ostinə girəcək şirkət hazırda yolda olan 600 avtomobillə fəaliyyətini davam etdirir. Yeni investisiya şirkətə indi daha çox şəhərlərə xidmət göstərməyə kömək edəcək.

Əvəz Həsənov