"Meta" şirkəti süni intellekt sahəsində fəaliyyət göstərən "Scale AI" adlı özəl şirkətə milyardlarla dollar dəyərində sərmayə yatırmaq niyyətindədir.

Valyuta.az xəbər verir ki, sövdələşmənin ümumi dəyəri 10 milyard dolları ötə bilər. Bu isə "Facebook"un ana şirkəti olan "Meta"nın süni intellekt sahəsindəki ən böyük xarici investisiyası və ümumilikdə özəl bir şirkət üçün indiyədək həyata keçirilmiş ən iri maliyyələşdirmələrdən biri ola bilər.

Nəzərə çatdıraq ki, "Scale AI" şirkəti süni intellekt modellərinin öyrədilməsi üçün "Microsoft", "OpenAI" kimi texnologiya nəhənglərinə məlumatların etiketlənməsi xidmətlərini təqdim edir. Şirkətin baş direktoru Aleksandr Vanqdır. Bu prosesin əhəmiyyətli hissəsi podratçılar tərəfindən yerinə yetirilir.

"Bloomberg"in məlumatına əsasən, "Scale AI" şirkətinin ötənilki gəliri 870 milyon dollar təşkil edib və bu il gəlirin 2 milyard dollara çatacağı gözlənilir. "Meta" artıq əvvəlki mərhələdə "Scale AI"nin 13,8 milyard dollar dəyərində qiymətləndirildiyi 1 milyard dollarlıq F seriyalı investisiya raundunda investor qismində iştirak edib.

Qeyd edək ki, "Scale AI" şirkəti hərbi məqsədlər üçün hazırlanmış böyük dil modeli olan "Defense Llama" layihəsini də məhz "Meta"nın "Llama 3" modelinin əsasında yaradıb.

Sərvanə Rəmixanova