
Gələcəyin ən uğurlu və sıradan çıxacaq peşələri - Onları robot əvəz edəcək
“Gələcəyin uğurlu peşə və ixtisasları hələ bizim bilmədiyimiz, ortada olmayan peşələrdir”.
Bu sözləri Valyuta.az-a təhsil məsələləri üzrə ekspert Qoşqar Məhərrəmov gələcəyin uğurlu peşələri haqqında danışarkən deyib.
Ekspert bildirib ki, bizim bu istiqamətdə sadəcə təxminlərimiz var:
“Elmin, texnologiyanın, cəmiyyətlərin getdiyi istiqamətdə müəyyən təxminlər çoxdur. Ancaq bunlar təxmindir, gələcək bizi sürprizlərlə qarşılayır”.
Qoşqar Məhərrəmov deyib ki, gələcəyin peşələri haqqında danışarkən iki məsələyə diqqət etmək lazımdır:
“Bu məsələlərdən biri texnologiyanın inkişafı, digəri də insanın yalnızlaşmasıdır. Texnologiyanın inkişafı kompüter elmlərini, robotexnikanı aktual edir. Bununla da kompüter texnologiyası və süni zəka kimi sahələrin digər sahələrə inteqrasiyasını əhatə edən peşələr aktual olur.
Məsələn, informasiya-komunikasiya texnologiyalarının, yüksək elmi yükə malik olan texnologiyaların tibbə, kənd təsərrüfatına, virtual oyun sənayəsinə inteqrasiyası və s. bu kimi ixtisaslar aktualdır.
İkinci məsələ isə insanın yalnızlaşmasıdır. Bu prosesdə mentorluq, psixologiya, kouçinq kimi sahələr hazırda da aktualdır və bu artacaq. Mentor və kouç olacaq insanlar üçün müəllimlik aktual olaraq qalacaq. Hər bir halda bir rəhbərə, fasilitatora, yol yoldaşına ehtiyac olacaq. Müəllimin mövqeyi bu formada dəyişir. Əgər müəllim mövqeyini bu formada dəyişsə, o zaman onun da peşəsi aktual olaraq qalır. Amma ənənəvi öyrədici müəllim tipində qalsa, əlbəttə ki, həmin şəxslər işini itirər. Bundan əlavə, ənənəvi ixtisaslardan tibb hər zaman öz aktuallığını qoruyur”.
Ekspert əlavə edib ki, ən aktual peşələr yüksək elm, texnologiya daşıyan kompüter elmləridir:
“Sıradan çıxan peşələr isə ənənəvi mühasibatlıq, ənənəvi həkimlərin resept yazması, insanların hüquqi proseslərdə ərizələrini, sənədlərini yazma, tərcüməçilik kimi peşələr olacaq. Çünki onların bir çoxunu robotlar edəcək. İstehsalat sektorunda isə az adama, yalnız robotları idarə etmək üçün insanlara ehtiyac olacaq. Buna görə də insanlara artıq fərqli səriştə və bacarıqlar lazımdır ki, onlar fiziki əməklə məşğul olan robotu idarə edə bilsin”.
Davud
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay