"YouTube" yaş nəzarətini də süni intellektə həvalə edir

"YouTube" istifadəçilərin yaşını təsdiqləmək üçün süni intellekt dəstəkli yeni bir sistem tətbiq etməyə hazırlaşır. Əgər süni intellekt yetkin bir şəxsi səhvən yeniyetmə kimi qəbul edərsə, həmin şəxs yaşını sübut etməli olacaq.

Valyuta.az xəbər verir ki, yeni sistem 2025-ci ilin avqust ayında ilk olaraq ABŞ-da kiçik bir istifadəçi qrupu üzərində sınaqdan keçiriləcək. Süni intellekt istifadəçinin baxış tarixi, video seçimləri, hesab yaşı kimi müxtəlif siqnalları təhlil edərək onun 18 yaşdan aşağı olub-olmadığını proqnozlaşdıracaq. Bu proqnoza əsasən istifadəçilər "yeniyetmə" təcrübəsinə uyğun şəkildə qiymətləndiriləcək.

Əgər sistem bir istifadəçinin 18 yaşdan aşağı olduğunu müəyyən etsə, platforma avtomatik olaraq aşağıdakı yaş əsaslı qoruma tədbirlərini tətbiq edəcək: fərdiləşdirilmiş reklamlar deaktiv ediləcək, "fasilə vermə" kimi rəqəmsal rifah vasitələri aktivləşdiriləcək, bəzi həssas mövzularda təkrarlanan məzmunun göstərilməsi məhdudlaşdırılacaq və paylaşım və ya şərh zamanı məxfilik xəbərdarlıqları göstəriləcək.

Əgər sistem bir istifadəçini səhvən yeniyetmə kimi təsnif edərsə və həmin şəxs əslində yetkindirsə, o zaman istifadəçi şəxsiyyət vəsiqəsi, kredit kartı və ya selfi təqdim etməklə yaşını təsdiqləməli olacaq. Yalnız süni intellekt tərəfindən 18 yaşdan yuxarı olduğu təxmin edilən və ya bunu sübut edən istifadəçilər yaş məhdudiyyətli məzmuna çıxış əldə edə biləcəklər.

Paşa Məmmədli