İşdə daha sürətli işləmək və səmərəliliyi artırmağın 10 yolu - SƏHƏR OXUSU

İş mühitində vaxtın effektiv idarə olunması həm məhsuldarlığın, həm də peşəkar dəyərin artmasına birbaşa təsir edən əsas bacarıqlardan biridir. Mütəxəssislərin fikrincə, düzgün yanaşmalar və sadə üsullar vasitəsilə işləri daha tez tamamlamaq, vaxt itkisini azaltmaq və nəticələri yaxşılaşdırmaq mümkündür. 

Valyuta.az iş prosesini sürətləndirməyə kömək edən 10 tövsiyə təqdim edir. 

1. İş masasını və iş mühitini səliqəli saxlamaq

Səliqəli iş sahəsi diqqəti yayındırmır və lazımi materiallara daha tez çıxış imkanı yaradır. Masanın, sənədlərin və kompüter qovluqlarının düzgün təşkili ümumi iş tempini artırır.

2. Diqqəti yayındıran amillərdən uzaq durmaq

Mobil telefon, sosial şəbəkələr, təsadüfi söhbətlər və elektron cihazların yaratdığı narahatlıqlar vaxt itkisinə səbəb olur. Bildirişlər deaktiv edilməli, iş zamanı diqqət tamamilə tapşırığa yönəldilməlidir.

3. Böyük layihələri hissələrə bölmək

Geniş layihələri kiçik tapşırıqlara ayırmaq həm planlamağı asanlaşdırır, həm də prosesi daha sürətli edir. Tapşırıqlar prioritetə görə sıralanmalı və hər biri üçün ayrıca zaman çərçivəsi müəyyən edilməlidir.

4. İşə başlamazdan əvvəl plan tərtib etmək

Planlı fəaliyyət hədəflərin dəqiq müəyyənləşdirilməsinə və vaxt itkisinin qarşısının alınmasına kömək edir. Hər bir məqsəd “spesifik, ölçülə bilən, real, vaxtında tamamlanan” prinsiplərinə əsaslanmalıdır.

5. Multitasking-dən (eyni anda çox iş görməkdən) qaçmaq

Bir neçə işi paralel aparmaq diqqəti bölür və prosesi ləngidir. Mütəxəssislər bir anda yalnız bir tapşırığa fokuslanmağı tövsiyə edirlər.

6. Tapşırıqlara daha az vaxt ayırmaq

İnsanlar çox vaxt tapşırıqlara ehtiyac olandan artıq zaman ayırırlar. Tapşırığa əvvəlcə minimal vaxt təyin etmək və nəticəni izləyərək təkmilləşdirmək səmərəliliyi artırır.

7. Perfeksionizmdən uzaq durmaq

Hər işi mükəmməl etmək cəhdi çox vaxt ləngitməyə səbəb olur. Keyfiyyətli, lakin vaxtında tamamlanmış iş, həddindən artıq detallara diqqət edilməsindən daha faydalıdır.

8. İş tempini düzgün tənzimləmək

Vaxtında qısa fasilələr vermək beyin yüklənməsinin qarşısını alır və uzunmüddətli məhsuldarlığı artırır. İş-güc balansının qorunması həm fiziki, həm də psixoloji fayda yaradır.

9. Mütəmadi fasilələr etmək

Gündəlik qısa istirahətlər enerjini bərpa edir, zehni yorğunluğun qarşısını alır və yaradıcılığı gücləndirir. Fasilələr əvvəlcədən planlaşdırılmalı və işdən tam ayrılmaqla keçirilməlidir.

10. Oxşar tapşırıqları qruplaşdırmaq (batching)

Oxşar xarakterli işləri ardıcıl yerinə yetirmək diqqətin dağılmasının qarşısını alır və prosesi sürətləndirir. Bunun üçün tapşırıqlar siyahısı çıxarılmalı, oxşar mərhələlər bir yerə toplanmalı və zaman cədvəli tərtib edilməlidir.

Sərvanə Rəmixanova