Telefonun batareyasının daha uzun işləməsi üçün 5 sadə üsul

Müasir smartfonlar funksionallığı baxımından əvvəlki nəsil cihazları çox geridə qoysa da, batareyanın tez boşalması problemi bir çox istifadəçini narahat edir. 

Valyuta.az xəbər verir ki, "Express" nəşrinin yazdığına görə, texnologiya üzrə ekspert Henri Barrell batareyanın ömrünü uzatmaq üçün beş sadə və universal tövsiyə təqdim edib. Bu üsullar həm "iPhone", həm də Android cihazlarına aiddir.

1. Avtomatik parlaqlıq tənzimlənməsini söndürün

Telefon ekranı enerji sərf edən əsas komponentlərdən biridir. Avtomatik rejimdə ekran parlaq gün işığında öz-özünə işığı artırır ki, bu da batareyanı daha tez boşaldır. Parlaqlığı əl ilə idarə etməklə enerjiyə qənaət edə bilərsiniz.

2. Tünd (qara) rejimi aktiv edin

Ağ fonda işləyən menyular və tətbiqlər ekranın daha çox enerji sərf etməsinə səbəb olur. Tünd rejim isə qara fon və daha az işıqlandırılmış interfeys təqdim edir. Bu, xüsusilə OLED ekranlı telefonlarda batareyanın ömrünü uzadır.

3. Enerji qənaəti rejimini aktivləşdirin

Bu rejim telefonun əsas funksiyalarını deaktiv etmədən bəzi arxa plan proseslərini məhdudlaşdırır. Bununla, tətbiq sinxronizasiyası, geolokasiya və digər arxa plan funksiyaları azalır, bu isə enerji sərfini xeyli azaldır.

4. Ekran ayarlarını əl ilə tənzimləyin

Ekran parlaqlığı ilə yanaşı, yenilənmə tezliyi (refresh rate) də batareyaya təsir edir. Android cihazlarda bu göstərici 60 Hz-dən 120 Hz-ə qədər dəyişə bilir. Əgər ehtiyac yoxdursa, daha aşağı tezlik seçmək batareyanın ömrünü artırır. Həmçinin bəzi modellərdə ekranın icazə (resolution) səviyyəsini azaltmaq da mümkündür.

5. Batareya doldurma parametrlərini dəyişin

Telefon batareyaları zamanla öz tutumunu itirir, bu da onların mütəmadi doldurulması və boşaldılması ilə bağlıdır. iPhone cihazlarında "Optimallaşdırılmış enerji doldurma" funksiyası aktiv edilə bilər. Bu rejim telefonun gündəlik istifadəsinə uyğun olaraq batareyanı 80%-ə qədər doldurur və yalnız ehtiyac olduqda 100%-ə çatdırır. Android cihazlarda isə "bazal", "adaptiv" və "maksimum" batareya qoruma rejimləri mövcuddur.

Ekspert Barrell xəbərdarlıq edir ki, sürətli enerji doldurma texnologiyaları hər nə qədər rahat olsa da, uzunmüddətli perspektivdə batareyaya əlavə yük yaradır və onun ömrünü azalda bilər.

Paşa Məmmədli