"Paysis"in (Epul.az) fəaliyyəti dayandırıldı - Qanunsuz qumar oyunlarına görə...

Qumar oyunları təşkil etməkdə ittiham olunan “Paysis” MMC-nin bütün ödəniş xidmətləri (yalnız vəsaitlərin geri qaytarılması istisna olmaqla) müvəqqəti olaraq dayandırılıb.

Valyuta.Az xəbər verir ki, bu barədə Azərbaycan Mərkəzi Bankı məlumat yayıb.

Mərkəzi Bank bildirir ki, cinayət işi üzrə istintaq başa çatana və məhkəmə qərarı qüvvəyə minənədək “Paysis”ə lisenziyası çərçivəsində xidmət göstərmək qadağan edilib.

Baş Prokuror yanında Korrupsiyaya qarşı Mübarizə Baş İdarəsinin yaydığı rəsmi məlumata görə, internet üzərindən qumar oyunları təşkil olunması ilə bağlı başlanmış cinayət işi çərçivəsində “Paysis” MMC və onun rəhbərinə qarşı da hüquqi tədbirlər görülür. İş baxılması üçün Bakı Ağır Cinayətlər Məhkəməsinə göndərilib.

Qeyd edək ki, "Paysis" MMC EPUL.AZ online ödəniş platformasının fəaliyyətinin icrasını təşkil edən şirkətdir.