“Temu” bu ölkədə 1 gündə çatdırılma xidmətinə başlayır

Elektron ticarət platforması “Temu” Türkiyədə sifarişlərin 1 iş günü ərzində çatdırılacağını açıqlayıb. Beləliklə, istifadəçilər artıq məhsullar üçün həftələrlə gözləmək məcburiyyətində qalmayacaqlar.

Valyuta.az xəbər verir ki, şirkət bu xidməti İstanbulda açılan yeni əməliyyat mərkəzi üzərindən reallaşdıracaq. Türkiyədə qurulan bu logistika bazası vasitəsilə sifarişlərin birbaşa yerli mərkəzdən göndərilməsi təmin olunacaq.

“Temu”nun bu addımı yalnız çatdırılma müddətini qısaltmaqla məhdudlaşmır. Şirkət indiyədək Türkiyəyə məhsul satışı zamanı İrlandiyada qeydiyyatda olan xarici hüquqi şəxs vasitəsilə fakturalar təqdim edirdi. Yeni sistemlə isə vergi və faktura prosesləri birbaşa Türkiyə daxilində həyata keçiriləcək. Bu dəyişiklik, “Temu”nun yerli qanunvericiliyə uyğun fəaliyyət göstərməsinə imkan verəcək.

Yeni mərhələ çərçivəsində “Temu” bir sıra kampaniyalara da start verib. Şirkət “Artıq Türkiyədəyik” şüarı altında endirimlər, pulsuz çatdırılma və digər təşviqedici təkliflərlə istifadəçiləri bu keçid prosesinə uyğunlaşdırmağa çalışır.

Qeyd edək ki, “Temu”nun Türkiyədə əməliyyat bazası qurması lokal strategiyanın bir hissəsidir. Şirkət daha öncə Avropa İttifaqı ölkələrində və ABŞ-də da oxşar logistika mərkəzləri yaradaraq məhsulların bu bazalardan göndərilməsini təmin etmişdi. Bu model sayəsində “Temu” həm çatdırılma müddətini azaldır, həm də logistika xərclərinə nəzarəti gücləndirir.

Sərvanə Rəmixanova