Bankların xarici valyutada maliyyə institutlarına kreditləri 38,7 milyon manat azalıb

Cari ilin yanvar-oktyabr aylarında Azərbaycanda bank sektoru, o cümlədən maliyyə institutları tərəfindən verilmiş kreditlərin ümumi həcmi 494 milyon manat təşkil edib.

Valyuta.az xəbər verir ki, bu göstərici ötən ilin eyni dövrü ilə müqayisədə 15,5 milyon manat və ya 3,04% azalıb. 2024-cü ilin müvafiq dövründə kreditlərin həcmi 509,5 milyon manat olub.

Hesabat dövründə xarici valyutada verilən kreditlərdə də azalma qeydə alınıb. Belə ki, xarici valyutada kreditlərin həcmi ötən ilin eyni dövrü ilə müqayisədə 38,7 milyon manat və ya 21,13% azalaraq 144,4 milyon manata düşüb. 2024-cü ildə bu göstərici 183,1 milyon manat təşkil edirdi.

Eyni zamanda, bank sektorunun, o cümlədən maliyyə institutlarında yerləşdirdiyi depozitlərin həcmi əhəmiyyətli dərəcədə artıb. 2024-cü ildə 2 milyard 276,9 milyon manat olan depozitlər, 2025-ci ildə 4 milyard 731,3 milyon manata yüksəlib.

Mayya Hüseynova