“Amazon”da ən çox rast gəlinən 5 fırıldaq

Elektron ticarət dünyası alıcıları aldatmağa çalışan fırıldaqçılarla doludur. Hər gün fırıldıqçılardan minlərlə insana müxtəlif tanınmış platformaların adlarından saxta mesajlar gəlir. Dünyanın ən böyük onlayn satış platformalarından biri olan “Amazon” da bu dələduzların əsas hədəflərindəndir. Onlar getdikcə daha inandırıcı üsullar icad edir, “Amazon” adı altında istifadəçiləri tələyə salmağa çalışırlar. 

Valyuta.az ən çox yayılmış 5 fırıldaq üsulu və onlardan qorunma yollarını təqdim edir:

1. “Hesabınız dayandırılıb!” bildirişi

Bu fırıldaq adətən e-poçt vasitəsilə gəlir, mövzu sətiri isə istifadəçidə panika yaratmaq üçün seçilir. Mesajda “Amazon” loqosu və hesab məlumatlarını yeniləmək üçün link yerləşdirilir.

Necə qorunmalı: “Amazon” kritik hesab məsələlərini e-poçtda göndərilən təsadüfi linklərlə həll etmir. Göndəricinin ünvanını yoxlayın, yazı səhvlərinə diqqət edin və linkə klikləmək əvəzinə birbaşa Amazon.com-a daxil olun.

2. “Gözlənilməz geri ödəmə” SMS-i

Fırıldaqçılar SMS-lə guya sifarişinizin standartlara uyğun olmadığı və tam məbləğdə geri ödəmə ediləcəyi barədə xəbər verir. Linkə keçid isə saxta “Amazon” giriş səhifəsinə aparır.

Necə qorunmalı: “Amazon” bəzən SMS göndərir, lakin sifariş detallarını göstərmədən pul qaytarılması barədə bildiriş çox şübhəlidir. Linkə daxil olmayın, rəsmi sayt və ya tətbiqdən hesabınıza baxın.

3. “Təsadüfi artıq geri ödəmə” hiyləsi

Bu üsulda fırıldaqçılar guya sizə yanlışlıqla artıq məbləğdə geri ödəmə edildiyini deyərək, fərqi geri göndərməyinizi istəyir. Çox vaxt bunu hədiyyə kartı və ya pul köçürməsi ilə tələb edirlər.

Necə qorunmalı: Bank hesabınızı və “Amazon” balansınızı yoxlayın. “Amazon” heç vaxt sizdən hədiyyə kartı və ya uzaqdan kompüterə giriş tələb etməz.

4. “Sifarişiniz göndərildi!” – amma hansı sifariş?

İstifadəçiyə sifariş etmədiyi çox vaxt baha qiymətli məhsul barədə təsdiq e-poçtu göndərilir. Məqsəd “Sifarişi ləğv et” linkinə klikləməyə məcbur etməkdir.

Necə qorunmalı: Hesabınıza birbaşa daxil olub “Sifarişlər” bölməsini yoxlayın. Əgər həmin məhsul orada yoxdursa, bu, fırıldaqdır.

5. “Gizli bağlama” fırıldağı

Adınıza “Amazon”dan sifariş etmədiyiniz, dəyəri az və təsadüfi məhsul göndərilir. Satıcılar bu üsulla saxta müsbət rəylər yaradır.

Necə qorunmalı: “Amazon” müştəri xidmətinə müraciət edərək belə bağlamaları bildirin. Ünvanınız istifadə edildiyi üçün kredit hesabatınızı da mütəmadi yoxlamağınız məsləhətdir.

Sərvanə Rəmixanova