Psixoloqların fikrincə, "Məktəb necə idi?" və "Günün necə keçdi?" uşaqlara veriləcək yaxşı suallar deyil.

Uşaq psixoloqu Marta Deiros Kollado CNBC-yə müsahibəsində bu barədə danışıb. Onun sözlərinə görə, uşaqlar evdə məktəbdən danışmaq istəməyə bilərlər:

“Böyüklərin çoxu işdən sonra işi dayandırmaq və evdə işdən danışmamaq istəyir. Uşaqlar da eynidir. Onların zehninin fasiləyə ehtiyacı var və çox vaxt əsas diqqətləri yemək, əyləncə, oyun və istirahətə yönəlir”.

Bundan əlavə, o, bildirir ki, hər gün eyni sualı vermək uşağınızı bezdirəcək və o həmişə eyni cavabı verəcək: “Yaxşı idi”.

Mütəxəssis deyir ki, uşağınızın gününü necə keçirdiyini öyrənmək istəyirsinizsə, öz gününüzü ona danışmaqdan başlaya bilərsiniz:

"Uşağınızın günü haqqında eşitmək və onlarla əlaqə qurmaq istəyirsənsə, bu, səninlə başlamalıdır. Gününüz haqqında, nələr etdiyinizi, necə hiss etdiyinizi danışın. Həqiqi bir şey haqqında danışın, sizi güldürən, təəccübləndirən, uşağınızı xatırladan, danışdığınız birisi, naharda nə yediyiniz barədə danışın. Siz gününüzü uşağınıza danışdıqca onun da öz gününü danışmaq arzusu güclənir, belə olduqda o da sizinlə bölüşəcək”.

Psixoloqun sözlərinə görə, uşaqlarınıza elə suallar verməlisiniz ki, cavabı “hə”, “yox” və ya qısa cavablar olmamalıdır. Məsələn, bunları soruşa bilərsiniz:

"Bu gün səni nə güldürdü?"

"Bu gün baş verən ən sevdiyin hadisə hansı idi?"

"Bu gün oyun vaxtı və ya naharda ən çox nə xoşuna gəldi?"

"Bu gün müəllim sənə nə dedi və ya dostunla nə danışdın?"

Deiros Kollado deyir ki, duyğular haqqında danışmaq da vacibdir, çünki onlar sizə uşağınızın gününün fərqli tərəfini göstərə bilər.

Məsələn, soruşa bilərsiniz:

“Bu gün kədərləndinmi? Səni daha yaxşı hiss etdirən nə oldu?”

"Sənin üçün nə çətin olsa da onu etdin?"

“Özünü tənha hiss etdiyin vaxt olubmu? Belə olanda nə etdin?”

Nuray