"Nvidia" "Groq"un gizli silahını ələ keçirdi

“Nvidia” korporasiyası süni intellekt startapı “Groq” ilə lisenziya sazişi imzaladığını açıqlayıb. 

Valyuta.az xəbər verir ki, razılaşmaya əsasən, “Nvidia” gələcək məhsullarında “Groq”un aşağı gecikməli çip texnologiyasından istifadə hüququ əldə edib.

Şirkətlərin yaydığı məlumata görə, “Groq” müstəqil şirkət kimi fəaliyyətini davam etdirəcək, lakin yeni icraçı direktor təyin olunacaq.

Açıqlamada bildirilir ki, “Groq”un baş icraçı direktoru Conatan Ross da daxil olmaqla bəzi yüksək vəzifəli rəhbərlər lisenziyalaşdırılmış texnologiyanın “Nvidia” məhsullarına inteqrasiyasını dəstəkləmək üçün “Nvidia”ya qoşulacaqlar. Conatan Ross daha əvvəl “Google”da çalışıb və şirkətin süni intellekt iş yüklərində istifadə olunan Tensor Processing Unit (TPU) çipinin hazırlanmasında iştirak edib.

2016-cı ildə təsis edilən “Groq” sentyabr ayında 750 milyon ABŞ dolları həcmində investisiya cəlb edib. Şirkətin investisiyadan sonrakı dəyəri 6,9 milyard ABŞ dolları olaraq açıqlanıb.

“Nvidia” bildirib ki, “Groq”un aşağı gecikməli çipləri şirkətin məhsullarına yeni imkanlar qazandıracaq və yeni bazar sahələrinin açılmasına şərait yaradacaq.

Paşa Məmmədli