“Qlobal Hedcinq fondları daşınmaz əmlak ehtiyatlarından başqa hər şeyi satır” - Goldman Sachs

Qlobal hedcinq fondları keçən həftə səhmləri sataraq, azalan bazarlarla bağlı mərclərini artırıb.

Valyuta.az “Goldman Sachs”ın məlumatına istinadən xəbər verir ki, ABŞ Prezidenti Donald Trumpın Kanada, Meksika və Çinə tətbiq etdiyi yeni tariflərdən sonra, qlobal səhmlər ucuzlaşıb və ticarət müharibəsinin başlanması ilə iqtisadi artım təhdid altına düşüb.

Hedcinq fondları, Asiyanın inkişaf etmiş bazarlarından başqa, bütün coğrafi bölgələrdə səhmlərini satıb. “Goldman Sachs”ın qeydinə görə, satışlar avqust ayından bəri ən böyük həcmə çatıb, əsasən, sənaye, istehlakçı məhsulları, enerji və rabitə xidmətləri səhmləri satılıb.
Bununla yanaşı, daşınmaz əmlak sektoru hedcinq fondlarının yatırım etdikləri yeganə sahə olaraq qalır. “Goldman Sachs” bildirir ki, fondlar son iki ayda daşınmaz əmlak səhmlərinə ən yüksək sürətlə yatırım edib. Daşınmaz əmlakın inflyasiya mühitində yaxşı performans göstərdiyini qeyd edən Erlen Capital Managementın idarəedici direktoru Bruno Şneller bu sektoru "cəlbedici hedcinq" olaraq xarakterizə edib.

Hedcinq fondları daşınmaz əmlakın artan qiymətləri və kirayə gəlirləri ilə inflyasiya mühitində daha sabit gəlir təmin edəcəyinə inanır. Bu sahə, ticarət müharibələrinin inflyasiya təzyiqlərini artıracağı ehtimalı ilə daha cəlbedici hala gəlib.

Sərvanə Rəmixanova