Kredit kartından hansı nəsil daha çox istifadə edir?

2023–2024-cü illərdə aparılan beynəlxalq araşdırmalar dünya üzrə kredit kartı istifadəsinin əsasən "millennials" (1981–1996) və "Gen X" (1965–1980) nəsilləri tərəfindən həyata keçirildiyini göstərir. Bu qruplar yalnız daha çox sayda kredit kartına sahib olmaqla kifayətlənmir, həm də ödənişlərin həcmi və tezliyi baxımından digər yaş kateqoriyalarını üstələyir.

Valyuta.az xəbər verir ki, "Visa Global Insights"ın 2024-cü il hesabatına əsasən, "millennials" nəsli, xüsusilə Asiya, Avropa və Latın Amerikası kimi inkişaf etməkdə olan regionlarda ən aktiv kredit kartı istifadəçiləri hesab olunur.

Onların təxminən 70-75 faizi kredit kartı və ya kredit əsaslı digər ödəniş vasitələrindən istifadə edir. Bu nəsil mobil ödəniş və rəqəmsal bankçılıq xidmətlərinə daha çox üstünlük verir və onlayn alış-veriş sahəsində aparıcı rol oynayır.

Daha uzun kredit tarixçəsinə malik olan "Gen X" nəsli isə kredit kartı üzrə ən yüksək borc səviyyəsinə sahibdir. Araşdırmalara görə, bu qrupun 80-85 faizi kredit kartı istifadə edir. Xüsusilə Avropa və Şimali Amerikada geniş istifadəçi bazasına malik olan bu nəsil kredit kartlarından əsasən ailə, daşınmaz əmlak və təhsil kimi böyük xərclər üçün istifadə edir.

1997-2012-ci illər arasında doğulan "Gen Z" nəsli isə ən aşağı kredit kartı sahibliyinə malikdir. "Statista" və "McKinsey" tərəfindən yayımlanan hesabatlara əsasən, bu qrupun yalnız 30-40 faizi kredit kartı istifadə edir. Əvəzində, onlar daha çox rəqəmsal cüzdanlar, “Buy Now, Pay Later” (indi al, sonra ödə) sistemləri və debet kartlarına üstünlük verirlər. Bu yanaşma xüsusilə Cənub-Şərqi Asiya, Yaxın Şərq və Afrika kimi bölgələrdə daha geniş yayılıb.

Daha əvvəlki nəsil olan "baby boomers" isə ənənəvi bankçılıq vasitələrindən istifadəni davam etdirir. Kredit kartı sahibliyi bu qrupda nisbətən yüksək olsa da, istifadə tezliyi və aktivlik baxımından digər nəsillərlə müqayisədə aşağıdır. Onlar kredit kartını əsasən sabit, təhlükəsiz ödəniş və büdcəyə nəzarət vasitəsi kimi görürlər.

Ümumilikdə, qlobal miqyasda kredit kartı istifadəsində artım müşahidə olunur. Bu artım əsasən rəqəmsal bank xidmətləri və e-ticarət platformalarının genişlənməsi ilə bağlıdır. Ekspertlər hesab edirlər ki, gələcək illərdə bu tendensiya davam edəcək və xüsusilə gənc nəsillər arasında alternativ ödəniş üsullarına keçid daha da sürətlənəcək.

Mayya Hüseynova