MrBeast "YouTube"dan milyonları necə qazanır?

YouTube-un kralı, milyardlıq kontent imperiyasının sahibi – MrBeast.

Son illərin ən çox danışılan internet ulduzu Cimmi Donaldson, tanınan adı ilə MrBeast, 2025-ci ildə dünyanın ən zəngin YouTuber-i elan olunub. 

Valyuta.az xəbər verir ki, onun sərvəti bu il 1 milyard avro səviyyəsində qiymətləndirilir ki, bu da onu təkcə platformada deyil, bütün rəqəmsal yaradıcılar arasında lider mövqeyə gətirib çıxarır.

Hər şey necə başladı?

Cimmi Donaldson 1998-ci il mayın 7-də ABŞ-ın Kanzas ştatının Viçita şəhərində doğulub, Şimali Karolinanın Qrinvill şəhərində böyüyüb. Onun YouTube macərası cəmi 13 yaşında başlayıb – video oyunları və çağırış janrında videolarla.

2017-ci ildə çəkdiyi “100.000-ə qədər saymaq” adlı videosu ilə viral uğur qazandı və bu, onun yüksəlişində əsas dönüş nöqtəsi oldu.

Uğurun formulu: Səxavət, fərqlilik və risk

MrBeast-in kontentində əsas elementlər möhtəşəm çağırışlar, nəhəng pul mükafatları, xeyriyyə kampaniyaları və ağlasığmaz səhnə quruluşlarıdır. Bu unikal yanaşma onu təkcə izləyicilər arasında deyil, brendlər və investorlar üçün də cəlbedici tərəfdaş halına gətirib.

1 milyard avroluq sərvətin mənbələri:

YouTube reklam gəlirləri
– Milyardlarla baxışla böyük reklam gəlirləri təmin edir.

Sponsorluq və brend əməkdaşlıqları
– Videolarda brend adı çəkilməsi üçün şirkətlər 3 milyon avroya qədər ödəyirlər.

Ticarət markaları – "Feastables"
– 2024-cü ildə bu şirniyyat brendi 215 milyon avro gəlir əldə edib.

"Beast Philanthropy" xeyriyyə fondu
– Gəlirlərin böyük hissəsi xeyriyyəyə yönəldilsə də, bu layihələr MrBeast-in nüfuzunu artıraraq əlavə sponsorları cəlb edir.

Qeyd etmək maraqlıdır ki, MrBeast özü bildirir ki, bank hesablarında 1 milyon avrodan az nağd vəsaiti var. Çünki bütün qazancını videolarına və layihələrinə yenidən investisiya edir.

Şəxsi həyat və ailəsinin rolu

Cimmi Donaldson ailəsinin onun uğurundakı dəstəyini də gizlətmir. Anası onun şirkətlərində maliyyə nəzarətçisi olaraq fəaliyyət göstərir. Beləliklə, MrBeast-in imperiyası həm də ailəyə söykənən bir biznes modeli ilə idarə olunur.

O, əsasən Qrinvill şəhərində yaşayır və burada öz studiyalarını və işçilər üçün yaşayış yerlərini təşkil edib. Bu, həm də onun komanda ruhuna verdiyi əhəmiyyətin göstəricisidir.

Tənzilə Ağabalayeva