İlon Mask üçün böyük şok: BYD-dən 276 faizlik artım 

Çinin avtomobil nəhəngi BYD noyabr ayında Avropadakı satışlarını üç dəfədən çox artıraraq həm yerli, həm də xarici rəqiblərini geridə qoymaqda davam edib.

Valyuta.az xəbər verir ki, Avropa Avtomobil İstehsalçıları Assosiasiyasının (ACEA) məlumatlarına görə, BYD-in yeni avtomobil qeydiyyatları ötən ilin eyni ayında 4 821 olduğu halda, bu ilin noyabrında 16 158-ə yüksəlib. Böyük Britaniya, İslandiya, Lixtenşteyn, Norveç və İsveçrə də daxil edildikdə satışlar 21 133 avtomobilə çatıb.

ACEA iyul ayından etibarən BYD-ni statistik məlumatlarına daxil etməyə başlayıb və həmin tarixdən bəri çinli istehsalçının Avropada sabit artım nümayiş etdirdiyi müşahidə olunur. BYD aylıq satış artımında "Volkswagen" və "Tesla"nı geridə qoysa da, ümumi satış həcminə görə hələ də onlardan geri qalır.

Yanvar–noyabr dövründə BYD-in Avropa satışları 159 869 avtomobil olub. Eyni dövrdə "Volkswagen" 3 263 542, "Tesla" isə 203 382 avtomobil satıb. Bununla belə, BYD-in 276 faizlik artım tempi "Volkswagen"in 4,6 faizlik artımı və "Tesla"nın 28 faizlik azalması ilə müqayisədə Avropa sürücülərinin elektrikli və hibrid modelləri getdikcə daha çox seçdiyini göstərir.

"Tesla"nın Avropadakı satışları noyabr ayında kəskin azalıb. Avropa İttifaqında yeni qeydiyyatlar 34 faizdən çox azalaraq 12 130-a düşüb. Böyük Britaniya və digər kiçik bazarlar daxil edildikdə satışlar 12 faiz azalaraq 22 801 olub. Şirkət son aylarda artan rəqabətlə yanaşı, İlon Maskın Tramp administrasiyası ilə münasibətlərinin yaratdığı mənfi təsirlərlə də mübarizə aparmalı olub.

ACEA-nın məlumatına əsasən, noyabr ayında Avropada elektrikli avtomobil bazarı ümumilikdə güclənib. Batareya ilə işləyən elektrikli avtomobillərin satışları illik müqayisədə 44 faiz artıb, hibrid avtomobillər 4,2 faiz, plug-in hibrid modellər isə 38 faizdən çox yüksəlib. Ümumi minik avtomobili qeydiyyatları 2,1 faiz artaraq 887 491-ə çatıb. Almaniyada satışlar 2,5 faiz artıb, Fransada 0,3 faiz azalıb, İtaliyada isə sabit qalıb.

Paşa Məmmədli