Brend öz auditoriyasını necə seçməlidir?

Brend üçün uğurun açarı təkcə yaxşı məhsul və ya xidmət deyil. Əsas məsələ odur ki, bu məhsul kimin üçün yaradılıb. Çünki hər kəsə xitab etməyə çalışan brendlər, əslində, heç kim üçün yaddaqalan olmur. Güclü brendlər isə öz auditoriyasını dəqiq tanıyır, onun ehtiyaclarını anlayır və mesajını birbaşa ona yönəldir.

Bəs brend üçün “öz auditoriyası”nı necə düzgün seçə bilər?

Marketoloq Samir Mehdiyev Valyuta.az-a açıqlamasında bildirir ki, brend strategiyasının uğurlu olub-olmaması birbaşa düzgün hədəf auditoriyanın seçilməsindən asılıdır: “Təcrübəmdə dəfələrlə müşahidə etmişəm ki, güclü məhsula və ya xidmətə sahib olan brendlər belə auditoriyanı düzgün müəyyən etmədikdə bazarda istədikləri nəticəni əldə edə bilmirlər. Mənim fikrimcə, hədəf auditoriya seçimi brendin özünü tanıması ilə başlayır. Brend hansı problemi həll etdiyini, bazarda hansı boşluğu doldurduğunu və istehlakçıya hansı dəyəri təqdim etdiyini dəqiq bilməlidir. Bu mərhələ olmadan aparılan auditoriya seçimi əsasən təsadüfi olur və uzunmüddətli strategiya yaratmağa imkan vermir. Əlbəttə ki, demoqrafik göstəricilər auditoriyanın ilkin çərçivəsini formalaşdırır. Yaş, cins, gəlir səviyyəsi və coğrafi amillər brendin kimə xitab etdiyini müəyyən etməyə kömək edir. Lakin müasir marketinq reallığında bu məlumatlar kifayət etmir. İnsanların qərarları yalnız rasional deyil, eyni zamanda emosional əsaslara söykənir. Bu səbəbdən auditoriyanın dəyərləri, həyat tərzi, maraqları və motivasiyası kimi psixoqrafik faktorlar xüsusi önəm daşıyır”.

“Bununla yanaşı, davranış əsaslı analiz də diqqətdən kənarda qalmamalıdır. Müştərinin alış vərdişləri, qiymətə həssaslığı, endirim və kampaniyalara reaksiyası, həmçinin hansı platformalarda daha aktiv olması brend üçün vacib göstəricilərdir. Bu cür analizlər real dataya əsaslandığı üçün daha dəqiq və ölçülə bilən nəticələr təqdim edir. Praktikada rast gəlinən əsas problemlərdən biri brendlərin “hamıya xitab etmək” istəməsidir. Halbuki bu yanaşma brend mesajının zəifləməsinə və kommunikasiya dilinin qeyri-müəyyən olmasına səbəb olur. Fokuslanmış auditoriya seçimi brendə daha güclü mövqelənmə və daha effektiv kommunikasiya imkanı yaradır. Eyni zamanda qeyd etməliyəm ki, hədəf auditoriya seçimi birdəfəlik proses deyil. Bazar dinamikdir, istehlakçı davranışları dəyişir və brendlər bu dəyişikliklərə uyğunlaşmalıdır. Davamlı testlər, ölçmələr və strategiyanın yenilənməsi brendin bazarda aktual qalmasını təmin edir. Nəticə olaraq düşünürəm ki, hədəf auditoriyanı düzgün seçən brendlər yalnız satışlarını artırmır, eyni zamanda istehlakçı ilə daha güclü və uzunmüddətli əlaqə qururlar. Bu da brendin etibarlılığını və bazardakı mövqeyini möhkəmləndirən əsas amillərdən biridir”- deyə S.Mehdiyev qeyd edir.