“Meqa Sığorta”nın yığımları ilin əvvəlindən azalır - 2,3 milyonluq eniş...

“Meqa Sığorta”nın yığımlarında ilin əvvəlindən etibarən azalma davam edir. 

Valyuta.az-ın araşdırmasına görə, bu ilin ilk altı ayında sığorta şirkətinin yığımları 2,3 milyon manatdan çox azalıb. 

Belə ki, sözügedən dövrdə şirkət 15,57 milyon manat sığorta haqqı toplayıb ki, bu ötən ilin eyni dövrünə nisbətən 13% azdır.  Belə ki, 2024-cü ilin yanvar-iyun aylarında “Meqa Sığorta” 17,88 milyon manat sığorta haqqı toplaya bilmişdi. 

Sığorta şirkəti ilin ilk yarısında  7,8 milyon manat ödəniş həyata keçirib ki, bu də 2024-cü ilin eyni dövrünə nisbətən 23% çoxdur. 2024-cü ilin yanvar-iyun aylarında “Meqa Sığorta” 6,39 milyon manat sığorta ödənişini həyata keçirmişdi. 

Yığımların azalması fonunda ödənişlərin artması sığorta şirkətinin zərərliliyinə, yəni ödəniş-yığım nisbətinə mənfi təsir edib. Şirkət ötən ilin ilk yarısında topladığı hər 100 manatdan  36 manatını ödənişə yönəltmişdirsə, bu ilin eyni dövründə bu rəqəm 50 manata yüksəlib. 

Xatırladaq ki, “Meqa Sığorta” 1998-ci ildən fəaliyyət göstərən BE&G sığorta şirkətinin bazasında 2010-cu ildə yaradılıb. Onun nizamnamə kapitalı 23 milyon manatdır.

NARA