Roma yazılarını təhlil edən süni intellekt modeli təqdim edildi

"Google" Roma dövrünə aid yazıların tarixini, məzmununu və coğrafi mənşəyini analiz etməyə kömək edən "Aeneas" adlı ilk süni intellekt modelini təqdim edib. 

Valyuta.az xəbər verir ki, model xüsusilə natamam və zədələnmiş yazıtlarla işləyən tarixçilərin işini asanlaşdıracaq.

"Aeneas" mətnlə yanaşı yazıtların görüntülərini də təhlil edir və boşluqları doldura bilir. 10 simvola qədər olan natamam hissələrdə dəqiqlik faizi 73-ə çatır. 

Məlumata görə, layihə "Google"un "Nottingham Universiteti" və digər akademik tərəfdaşlarla əməkdaşlığı nəticəsində ərsəyə gəlib. Modelin əsasını 176 mindən çox Latınca yazıtın toplandığı verilənlər bazası təşkil edir.

Model məşhur Res Gestae Divi Augusti yazıtı üzərində test edilərək mətnin iki fərqli dövrə — e.ə. 10–1 və eramızın 10–20-ci illərinə aid ola biləcəyini göstərib. Bu yanaşma tarixçilərə müxtəlif ehtimalları rəqəmsal əsaslarla qiymətləndirməyə imkan verir.

Aeneas modeli "predictingthepast.com" saytı vasitəsilə tədqiqatçılar və təhsilçilər üçün açıq istifadəyə verilib. Kodlar və məlumat bazası da açıq mənbə kimi təqdim olunub.

Sərvanə Rəmixanova