Süni intellektə artan tələbat ABŞ-da elektrik enerjisinin qiymətlərini artırır

Süni intellektə əsaslanan texnologiyalara artan tələbat və bununla əlaqədar elektrik istehlakının artması ABŞ-ın ən böyük regionunda elektrik enerjisinin qiymətlərinin artmasına səbəb olub.

Valyuta.az xəbər verir ki, bu barədə "Financial Times" yazıb.

Nəşr bildirir ki, ABŞ-ın şərq və şimal-şərqindəki 13 sənayeləşmiş ştata, eləcə də paytaxt Vaşinqtona xidmət göstərən şəbəkə operatoru PJM bu il topdansatış qiymətlərində ötən illə müqayisədə 22% artım qeydə alıb. İstehlakçıların artan tələblərini ödəmək üçün operator 2026-cı ilin iyunundan 2027-ci ilin mayına qədər enerji təchizatçılarına 16 milyard dollar ödəyəcək - bu, bir il əvvəlkindən 10% çoxdur.

Bununla əlaqədar olaraq, PJM ilin sonuna qədər istehlakçılar üçün son qiymətlərin 1-5% artacağını gözləyir. "Bu, istehlakçılar üçün pis xəbər ola bilər. Enerji hərraclarında qiymət artımı son qiymətlərin bahalaşmasına səbəb olacaq", deyə "ClearView Energy Partners"in idarəedici direktoru Timoti Foks bildirib.

Paşa Məmmədli