“Bluesky” cümə axşamı axşam saatlarında elan edib ki, son 24 saat ərzində platformaya 1 milyondan çox insan qeydiyyatdan keçib. Nəticədə, sosial şəbəkənin ümumi istifadəçi sayı 16 milyonu keçib.  

Platformanın bu açıqlaması, “Instagram” rəhbəri Adam Mosserinin “Threads”in noyabr ayında 15 milyondan çox istifadəçi qazandığını bildirməsindən bir neçə saat sonra verilib. Mosseri əlavə edib ki, “Meta”ya məxsus bu platforma son üç ayda hər gün 1 milyon qeydiyyat əldə edib.

“Bluesky” cümə axşamı bəzi istifadəçilər üçün xidmətin əlçatmaz olması ilə bağlı kiçik texniki problemlər yaşayıb. Şirkətin açıqlamasına əasən, bu problemlər internet provayderlərdən birinin kabel nasazlığı və digər şəbəkə problemlərinin üst-üstə düşməsi nəticəsində yaranıb.  

Valyuta.az "TechCrunch"a istinadən xəbər verir ki, “Bluesky” son aylarda istifadəçi axını ilə diqqət çəkir. Bu tendensiyaya “X” platformasının Braziliyada qadağan olunması, “Threads”də moderasiya problemləri və ABŞ-da keçirilmiş seçkilərin nəticələri kimi hadisələr təsir göstərib.

“X”in sahibi İlon Mask ABŞ-ın yeni seçilmiş prezidenti Donald Trampın əsas tərəfdarlarından biri olub. Bundan əlavə, əvvəllər “Twitter” kimi tanınan bu sosial şəbəkə tez-tez istifadəçilərin algoritmik lentlərində Tramp tərəfdarı mövqeləri vurğulayıb. ABŞ-da keçirilmiş prezident seçkilərinin nəticələrindən sonra “Bluesky” bir həftə ərzində 1 milyondan çox yeni istifadəçi qazandığını bildirib.  

Hazırda, “Bluesky”ya son 24 saatda baş verən qeydiyyat dalğası, ABŞ "App Store"un pulsuz proqramlar reytinqində platformanı birinci yerə yüksəldib. İkinci və üçüncü yerlərdə isə “ChatGPT” və “Threads” qərarlaşıb.  

“Bluesky” hələ də ümumi istifadəçi bazası baxımından “Threads” (275 milyon aktiv istifadəçi) və “X” ilə müqayisədə kiçik qalır. Bununla belə, platformanın baş direktoru Cey Qraber bu həftənin əvvəlində bildirib ki, “Bluesky” “X”dən daha yüksək istifadəçi fəallığına sahibdir.  

“Bizdə, digər sosial şəbəkələrdəki 90-9-1 nisbətindən fərqli olaraq, daha çox yazı paylaşan istifadəçi var. Posterlərin nisbəti təxminən 30%-dən aşağı düşməyib” deyə o, bir paylaşımında qeyd edib.  

Keçən ay “Bluesky”, “Blockchain Capital” tərəfindən idarə olunan və “Alumni Ventures”, “True Ventures”, “SevenX”, “Darkmode”dan Amir Şevat və “Kubernetes” həmtəsisçisi Co Beda kimi investorların iştirak etdiyi "Series A" maliyyələşdirmə raundunda 15 milyon dollar vəsait topladığını açıqlayıb. Məhsul inkişafı baxımından isə şirkət abunəlik xidmətini istifadəyə verməyi planlaşdırır.  

Rəhim