MTK-dan alınan mənzilə necə çıxarış əldə edə bilərik?

Son illərdə MTK-lardan (mənzil-tikinti kooperativi) mənzil alan vətəndaşların sayı artmaqdadır. Bununla yanaşı, alınan mənzillərlə bağlı sənədləşmə məsələləri də aktual mövzulardan birinə çevrilib. Xüsusilə də, MTK-lardan mənzil alan şəxslər üçün çıxarış (kupça) alma prosesi bir sıra şərtlərlə bağlıdır. Prosesin necə aparıldığı və hansı mərhələlərdən ibarət olduğu çoxları üçün aydın deyil. Maraqlıdır, MTK-dan alınan mənzilə necə çıxarış əldə edə bilərik?

Valyuta.az xəbər verir ki, bu barədə Hüquqşünas Aydan Rəhimli məlumat verib: “MTK-dan alınan mənzilə çıxarış əldə etmək üçün bəzi şərtlər mütləq şəkildə tamamlanmalıdır. Belə ki, ilk olaraq mənzil istismara verilməli, onun tikintisi tamamlanmalı, həmçinin bina Əmlak Məsələləri Dövlət Xidmətində qeydiyyata alınmalıdır. Eləcə də binaya bütün kommunikasiyalar yəni, qaz, işıq, su və.s verilməlidir". 

Çıxarış əldə etmək üçün başqa mühüm sənədlər də lazımdır

A.Rəhimli bildirir ki, istismarı bitməyən binaya çıxarış əldə etmək mümkün deyil: “Əgər binaın istismarı bitməyibsə, ona çıxarış almaq kimi bir imkan yoxdur. Çıxarış əldə etmək üçün ilkin olaraq, siz MTK-dan evin rəsmi sənədlərini əldə etməlisiniz. Bu, müqavilə, qəbzlər, maliyyə arayışları, plan və.s.dir. Mənzilə məxsus olan sənədlər hazır olduqdan sonra Əmlak Məsələləri Dövlət Xidmətinə təqdim edirsiniz və onlar müvafiq araşdırma aparırlar. Araşdırma apardıqdan 15-20 gün sonra siz mənzilə çıxarış, yəni mülkiyyət hüququ əldə etmiş olursunuz".

Sərvanə Rəmixanova