"Apple" şirkəti ABŞ-da prezident Donald Trampın tətbiq etdiyi yüksək idxal rüsumlarından yayınmaq məqsədilə bir sıra addımlar atıb.

Valyuta.az xəbər verir ki, "Apple" Hindistandan 600 ton iPhone (təxminən 1,5 milyon ədəd) gətirmək üçün yük təyyarələri icarəyə götürüb. 

Məlumata görə, "Apple" ABŞ-a satış üçün iPhone ehtiyatlarını artırmaq və Trampın Çin istehsalı məhsullara tətbiq etdiyi 125 faizlik rüsumdan yayına bilmək üçün Hindistanda istehsalı sürətləndirib və məhsulların hava yolu ilə çatdırılmasına başlayıb. Qeyd edək ki, Hindistandan idxal olunan məhsullara tətbiq olunan 26 faizlik rüsum isə Trampın elan etdiyi 90 günlük fasilə ilə müvəqqəti dayandırılıb.

Bununla belə, "Apple" Çennay şəhərindəki hava limanında gömrük rəsmiləşdirmə müddətini 30 saatdan 6 saata endirmək üçün Hindistan rəsmiləri ilə danışıqlar aparıb. Nəticədə burada “yaşıl dəhliz” adlı xüsusi prosedur tətbiq edilib ki, bu da Çindəki bəzi hava limanlarında istifadə olunan modellə oxşardır..

Hazırda "Apple" dünya üzrə ildə 220 milyondan çox "iPhone" satır. “Counterpoint Research”in təxminlərinə görə, ABŞ-a idxal edilən "iPhone"ların beşdə biri artıq Hindistanda istehsal olunur. Qalan hissə isə Çindən gətirilir.

Ekspertlər bildirir ki, Çin istehsalı "iPhone"lara tətbiq olunan 125 faizlik rüsumlar ABŞ-də qiymətlərin kəskin artmasına səbəb ola bilər.

Digər tərəfdən "Apple" Hindistanda "iPhone" istehsalını 20 faiz artırmaq üçün əlavə işçilər cəlb edib və ölkənin ən böyük "Foxconn" zavodunda bazar günləri də iş rejimi tətbiq olunub.

Sərvanə Rəmixanova