Azərbaycan dövləti sosial rifahın gücləndirilməsi məqsədilə vətəndaşlara müxtəlif hallarda birdəfəlik müavinətlər təqdim edir.

BAKU.WS-in məlumatına görə, bu müavinətlər vətəndaşların həyatının mühüm mərhələlərində – uşaq doğulduqda, yaxınlarını itirdikdə, ilk dəfə işə düzəldikdə, azadlıqdan məhrumetmə cəzasını çəkib qayıtdıqda və ya işğaldan azad olunmuş ərazilərdə çalışmaq üçün köç etdikdə maddi dəstək məqsədi daşıyır.

Azərbaycanda mövcud olan əsas birdəfəlik müavinət növləri, onların məbləği və kimlərin bu müavinətləri ala biləcəyini təqdim edirik:

Uşağın anadan olmasına görə müavinət: Yeni doğulan hər uşaq üçün 500 manat məbləğində birdəfəlik müavinət verilir. ​

Dəfn üçün müavinət: Əmək pensiyaçısı vəfat etdikdə, dəfni təşkil edən şəxsə pensiyaçının vəfatı tarixinə əmək pensiyasının minimum məbləğinin üç misli məbləğində, sosial müavinət və ya işsizlikdən sığorta ödənişini alan şəxs vəfat etdikdə isə 500 manat məbləğində dəfn üçün birdəfəlik müavinət ödənilir. ​

Cəza çəkməkdən azad edilmiş tibbi və sosial yardıma ehtiyacı olan şəxslərə müavinət: Azadlıqdan məhrumetmə cəzasını çəkib azad edilmiş və tibbi-sosial yardıma ehtiyacı olan şəxslərə minimum aylıq əməkhaqqının dörd misli məbləğində birdəfəlik pul müavinəti verilir. ​

İşğaldan azad edilmiş ərazilərdə işləyən mütəxəssislərə müavinət: Bu ərazilərdə işləmək üçün azı bir il müddətinə əmək müqaviləsi bağlayan mütəxəssislərə ilkin maddi-məişət şəraitinin dəstəklənməsi məqsədilə 600 manat məbləğində birdəfəlik müavinət verilir. ​

Valideynlərini itirmiş və ya valideyn himayəsindən məhrum olmuş şəxslərə müavinət: Bu kateqoriyaya aid şəxslər ilk dəfə işə düzəldikdə 6000 manat məbləğində birdəfəlik müavinət alırlar.