NBA tarixinin ən uğurlu komandalarından biri olan "Boston Celtics" 6,1 milyard dollara satılıb. 

Valyuta.Az "CNN"ə istinadla xəbər verir ki, bu satış Şimali Amerikada idman klubları arasında indiyədək qeydə alınmış ən yüksək məbləğli müqavilə olub.

Komandanı satın alan investorlar qrupuna milyarder Uilyam Çişolm rəhbərlik edir. Qrupun digər üzvləri sırasında "Celtics"in mövcud investorlarından biri olan Rob Heyl və daşınmaz əmlak nəhəngi "Related Companies"in prezidenti Bryus Bil Cn. da yer alır.

"Celtics"in baş icraçı direktoru Vik Qrousbek cümə axşamı yaydığı açıqlamada bildirib: “Bil əla insandır və əsl "Celtics" azarkeşidir. Boston bölgəsində doğulub böyüyüb. Komandaya və şəhərə olan sevgisi, eyni zamanda "Celtics" rəhbərliyi ilə uyğunluğu onu komandanın yeni sahibi və rəhbəri olmaq üçün təbii bir seçim edir.”

Qrousbek ailəsi tarixində 18 çempionluq qazanan "Celtics"i 2002-ci ildə 360 milyon dollara almışdı. Bu isə komandanın dəyərində təxminən 1600 faiz artım deməkdir. Vik Qrousbek 2027-28 mövsümünün sonunadək komandanın rəhbəri vəzifəsində qalacaq.

Uilyam Çişolm Kaliforniyada yerləşən texnologiya sahəsinə investisiya edən "Symphony Technology Group" adlı şəxsi investisiya şirkətinin təsisçisi və idarəedici ortağıdır.

“Şimal sahilində böyümüş və Yeni İngiltərədə (ABŞ-nin şimal-şərqində yerləşən region) təhsil almış biri kimi, mən ömrüm boyu sadiq "Celtics" azarkeşi olmuşam,” – deyə Çişolm açıqlamasında bildirib. “Celtics-in Boston üçün nə qədər əhəmiyyətli olduğunu anlayıram – bu komandanın şəhər üçün daşıdığı rol ölkənin digər şəhərlərindəki heç bir idman komandası ilə müqayisə olunmaz.”

Bu satış NBA tarixindəki ən böyük müqavilə olmaqla yanaşı, ABŞ idman liqaları arasında da rekord göstərici kimi qeydə alınıb. Müqavilə, 2023-cü ildə "Washington Commanders" futbol komandasının 6,05 milyard dollara və "Phoenix Suns" basketbol klubunun 4 milyard dollara satışı kimi əvvəlki rekordları geridə qoyub.

Rəhim