Əgər 10 il əvvəl "Nvidia"ya 1000 dollar investisiya etmiş olsaydınız, bu gün sərvətiniz nə qədər olardı? Mütəxəssislər bunu hesablayıb və ortaya çıxan məbləğ kiçik bir sərvətə bərabər olub.

Valyuta.az xəbər verir ki, "Nvidia"nın qrafik prosessorları, "OpenAI"ın "ChatGPT"si və "Google"ın "Bard"ı da daxil olmaqla, süni intellekt modellərinin hazırlanmasının ayrılmaz hissəsinə çevrilib. Bu da şirkəti yüksək performanslı hesablama və süni intellekt texnologiyaları sahəsində bazar liderinə çevirib.

Məhz bu dominant mövqeyinə görə, "Nvidia" səhmləri bazarda ən yaxından izlənən səhmlərdən biridir.

"Nvidia" dünən bazarın bağlanmasından sonra 2024-cü maliyyə ilinin dördüncü rübü üzrə hesabatını açıqlayıb. Şirkət 39,33 milyard dollar gəlir əldə edərək, 38,05 milyard dollarlıq gözləntiləri üstələyib. Eyni zamanda, səhmlər üzrə qazanc 0,84 dollar proqnozuna qarşı 0,89 dollar olub.

"Meta", "Amazon" və "Alphabet" kimi texnologiya nəhəngləri süni intellekt mərkəzləri üçün "Nvidia"nın çiplərinə yatırım edib. Bu da şirkətin gəlirini 2024-cü ildə 114% artıraraq 130,5 milyard dollara çatdırıb.

CNBC-nin məlumatına görə, "Nvidia" səhmləri son iki ildə 440%-dən çox artıb və şirkət müəyyən bir dövrdə 3 trilyon dolları aşaraq ABŞ-ın ən dəyərli şirkəti olub. Lakin bu zirvədən sonra səhmlər müəyyən dərəcədə geriləyib.

10 il əvvəl yatırılan 1000 dollar indi nə qədərdir?

Uzunmüddətli perspektivdə "Nvidia" səhmlərinə yatırılan investisiyalar böyük gəlir gətirib. CNBC-nin hesablamalarına görə, 26 fevral tarixinə "Nvidia"nın bağlanış səhmlərinin qiyməti 131,28 dollar olub. Bu hesablamalar son maliyyə hesabatından sonra baş verə biləcək dəyişiklikləri nəzərə almır.

Bir il əvvəl yatırım etsəydiniz:

Artım: 66%
26 fevral tarixinə sərvətiniz: 1,660 dollar (təxminən 60 min manat)

Beş il əvvəl yatırım etsəydiniz:

Artım: 1,863%
26 fevral tarixinə sərvətiniz: 19,634 dollar (təxminən 716 min manat)

On il əvvəl yatırım etsəydiniz:

Artım: 23,584%
26 fevral tarixinə sərvətiniz: 236,835 dollar (təxminən 8,6 milyon manat)

Əgər 1999-cu ildə "Nvidia" IPO-sunda yatırım etsəydiniz:

Artım: 525,754%
26 fevral tarixinə sərvətiniz: 5,258,542 dollar (təxminən 191 milyon manat)

Uzunmüddətli yatırımların riski

"Nvidia"nın səhmləri möhtəşəm göstəricilər əldə etsə də, "Nasdaq" birjasında siyahıya alınan digər şirkətlər üçün bu tip artımlar tipik deyil. Mütəxəssislər yalnız keçmiş göstəricilərə əsaslanaraq fərdi səhmlərə yatırım etməyi tövsiyə etmir.

Bazarlar qeyri-müəyyən ola bilər və bir şirkətin hazırkı uğuru gələcəkdə eyni qazancı təmin etməyə zəmanət vermir.

Çoxsaylı investisiya mütəxəssisləri üçün riskləri minimallaşdırmaq məqsədilə aşağı xərcli indeks fondlarına yatırım etmək daha təhlükəsiz və effektiv strategiya hesab edilir.

Paşa Məmmədli