Populyar mesajlaşma platforması "WhatsApp"ın "bir dəfə baxış" funksiyasında aşkar edilən bir xəta göndərilən medianın "bir neçə dəfə" görüntülənməsinə səbəb olub.

Valyuta.az xəbər verir ki, "WhatsApp" istifadəçilərə bir foto və ya videonu göndərdikdən sonra onun qarşı tərəf tərəfindən bir dəfə baxıldıqdan sonra silinməsini təmin edən bir xüsusiyyət təqdim edir. Lakin iOS əməliyyat sistemində aşkarlanan bir xəta bu məzmunların istənildiyi qədər açılıb baxılmasına imkan yaradır.

Siber təhlükəsizlik araşdırmaçısı "Ramshath" tərəfindən ötən həftə aşkarlanan bu xətanı istismar etmək üçün heç bir texniki bilik tələb olunmur. Əgər sizə "bir dəfə baxış" rejimində media göndərilibsə, sadəcə aşağıdakı addımları yerinə yetirmək kifayətdir:

- Ayarlar > Saxlama və Məlumat > Saxlamanı idarə et bölməsinə keçin.

Sonra mesaj göndərən şəxslə olan söhbəti tapıb, məzmunları "ən yeniyə görə" sıralayın.

Burada "bir dəfə baxış" üçün göndərilmiş medianın hələ də saxlandığını görəcəksiniz.

Xəta yalnız "iPhone" istifadəçilərinə təsir edir. Dünyada "iPhone" istifadəçilərinin sayı nəzərə alındıqda, bu problem "WhatsApp"ın ana şirkəti "Meta" üçün ciddi bir məxfilik xətası hesab olunur.

"Ramshath" bu problemi "Meta"nın "xəta mükafatı" proqramı vasitəsilə şirkətə bildirdiyini və şirkətin problemdən xəbərdar olduqlarını və düzəltmək üçün işlədiklərini açıqladığını bildirib. Şirkət problemi həll etdiyini elan edib və "WhatsApp"ın iOS üçün 25.2.3 versiyasında xətanın aradan qaldırıldığı bildirilib.

İstifadəçilərə tətbiqi ən son versiyaya yeniləmələri tövsiyə olunur, xüsusilə də "bir dəfə baxış" rejimində göndərdikləri medianın həqiqətən də yalnız bir dəfə baxılmasını istəyirlərsə.

Bu, "WhatsApp"ın "bir dəfə baxış" funksiyası ilə bağlı ilk problemi deyil. 2024-cü ilin sentyabr ayında təhlükəsizlik araşdırmaçıları "silinmiş" medianın URL ünvanı vasitəsilə yenidən əldə edilə bildiyini aşkar etmişdi. "WhatsApp" həmin problemi də sonradan həll etmişdi.

Paşa Məmmədli