Çin dünyanın ən böyük hidroakkumulyasiya elektrik stansiyasını istismara verdi

Çində "Fennin" adlı dünyanın ən böyük hidroakkumulyasiya elektrik stansiyası (HAES) istismara verilib. 

Valyuta.az xəbər verir ki, bu barədə "Xinhua" məlumat yayıb.

Stansiyanın operatoru "China National State Grid" şirkətidir. Stansiya ildə 6,61 milyard kVt/saat elektrik enerjisi istehsal etmək gücünə malikdir. 2021-ci ildən bu günədək quraşdırılan bloklar təxminən 8,62 milyard kVt/saat elektrik enerjisi istehsal edib. İl ərzində bu stansiyanın 480,8 min ton şərti yanacağa qənaət edəcəyi və karbon qazı tullantılarını 1,2 milyon ton azaldacağı gözlənilir.

Bundan əvvəl "China Three Gorges Renewables Group" şirkəti 8 QVt gücə malik, səmərəliliyi ilə fərqlənən günəş elektrik stansiyasının tikintisi planlarını açıqlamışdı. Tikintinin bu ilin sentyabr ayında başlayıb, 2027-ci ildə tamamlanması nəzərdə tutulur.

Müqayisə üçün qeyd edək ki, dünyanın ən böyük üç günəş elektrik stansiyasının hər birinin gücü təxminən 3 QVt təşkil edir və onların hamısı Çində yerləşir. Yeni günəş elektrik stansiyası Çinin şimalında, Daxili Monqolustan bölgəsində inşa ediləcək və elektrik enerjisi ultrayüksək gərginlikli xətlər vasitəsilə ötürüləcək.

Paşa Məmmədli