Pensiya kapitalı və sosial ödənişlər niyə artdı? - Ekspert problemin səbəbini açıqladı

 

Bunu Qaynarinfo-ya açıqlamasında iqtisadçı ekspert Natiq Cəfərli minimum əməkhaqqının 15 faiz artması, pensiya məbləğinin isı 240 manatdan 280 manata qalxması fonunda, pensiya kapitalının minimum məbləğinin 34.560 manatdan 40.320 manata yüksəlməsinə münasibət bildirərkən deyib.

 

"Qanunda qeyd olunub ki, minimum təqaüd artan kimi pensiya kapitalı da avtomatik olaraq ona uyğun hesablanır. Qaydaya görə, minimum təqaüd artan kimi, onun 114 misli avtomatik olaraq yığım kapitalının minimum həddinə çevriləcək”, deyə ekspert əlavə edib.

 

Natiq Cəfərli qeyd edir ki, qanunvericilikdə bu məqam aradan qaldırılmayana qədər problem qalmaqda davam edəcək:

 

 

"Ölkədəki inflyasiya həddini, hər il indeksləşmənin aparıldığını və minimum təqaüdlərin artdığını nəzərə alsaq, avtomatik olaraq yığım kapitalının minimum həddi də artacaq. Bunun baş verməməsi üçün qanunvericilikdəki bağlantı aradan qaldırılmalıdır. Minimum əmək haqqının VÖEN-lə çalışanların Dövlət Sosial Müdafiə Fonduna ödənişləri də qanunla tənzimlənir. Bu da qanundan çıxarılmalıdır. Çünki minimum əmək haqqı artan kimi, avtomatik olaraq VÖEN-lə çalışanların DSMF-yə ödənişləri də artır. Qanunvericilikdə bu iki məsələ həllini taparsa, vətəndaşlar üzərlərinə düşən ağır yükdən xilas ola bilərlər”. 

 

Həmsöhbətimiz düşünür ki, pensiya məsələsilə DSMF təkbaşına məşğul olmamalı, özəl fondlar da prosesdə iştirak etməlidir: 

 

"Hesablamalar indiki kimi aparılmamalıdır. 800 minə yaxın VÖEN-lə çalışan var. Minimum əmək haqqı artan kimi, Bakı şəhəri üzrə onların ödənişləri 75 manatdan 86 manat 20 qəpiyə qalxıb. Əvəzində DSMF-yə minimum ödənişlərin həddini müəyyənləşdirmək olar. Digər tərəfdən, Fond pensiya məsələsilə təkbaşına məşğul olmamalıdır. Qanunvericlikdə nəzərdə tutulduğu kimi, bu istiqamətdə özəl fondlar da yaradılmalıdır ki, vətəndaşın seçim imkanı olsun. VÖEN ödənişlərinin də minimum həddi müəyyənləşməlidir”.