"London taksiləri” bir müddətdən sonra sıradan çıxıb, yararsız hala düşəcək”.

Valyuta.az xəbər verir ki, bunu Qaynarinfo-ya açıqlamasında iqtisadçı ekspert Natiq Cəfərli pandemiya vaxtı istifadəsiz qalan "London taksiləri”nin sonrakı aqibətindən danışarkən deyib. 

Onun fikrincə, bu taksilərin istifadəyə yararsız olduğunun yeganə səbəbi hökümətin taksi bazarına əl qoymasıdır:

"Hökumətin nəyinə lazım idi taksi bazarına daxil olsun? Bizdə dövlət hər bir sahədə aparıcı rol almağa çalışır. Dövlət iqtisadiyyatda ən pis menecer olduğuna görə nəticə etibarı ilə də dövlət şirkətləri, dövlətin əlində olan resurslar effektsiz darə olunur. "London taksiləri”nə ehtiyac vardısa, dövlət yaxşı şərtlərlə tender elan edərdi və  şəhərin gözəlliyini təmin etmək, qonaqlara yaxşı xidmət göstərmək üçün vergidən, yaxud da gömrükdən bir neçə illik azad olunmaq şərti ilə onlara imkan yaradılardı. Bu da özəl şirkətlərin məntiqi ilə olsaydı, heç taksi boş qalmazdı”. 

Natiq Cəfərli qeyd edib ki, dövlətin nəzarəti var deyə bu taksilər heç kimindir: 

“Əslində onu idarə edənlər daha çox pul qazanmağa çalışırlar, nəinki vətəndaşlara xidmət və gündəlik sürücülərin güzaranını düzətmək üçün. Taksi xidməti ölkədə nadir sahələrdən biridir ki, ciddi rəqabətli mühit var və özəl şirkətlərin və fərdi sahibkarlığın bu bazarda daha geniş təmsil olunması həm qiyməti ucuzlaşdırdı, həm xidmətin keyfiyyətini artırdı. Bu bir daha sübut edir ki, rəqabətli mühit nə qədər vacib amildir”.
 
Natiq Cəfərli qeyd edib ki, 2014-cü ilə nisbətən Azərbaycanda hər şeyin qiyməti qalxdığı halda taksi xidmətini qiyməti sabit qalıb:

"Bu da rəqabətli mühitə borcludur. Dövlət indi atdığı addımdan dərs çıxarmalıdır. Həmin şirkətlərin birinə ölkədə fəaliyyət göstərən və mobil uyğulamalar üzərindən sifarişlər alan şirkətlərə müraciət edə bilər ki, həmin maşınları onlar simvolik bir qiymətə icarəyə götürsünlər. Nəyə görə simvolik? Çünki baha olsa heç kim götürməyəcək. Boş və xarab olmaqdansa onlar götürüb işlədə bilərlər və bu əlavə iş yerlərinin yaradılması deməkdir. Artıq dövlət düşünməlidir ki, bu pulu itirib, çünki bu işə girişməməli idi. Heç olmasa insanlar indi iş yeri qazansın deyə bunu özəl şirkətlərə icarəyə verməlidirlər. Özəl şirkətlərlə uzun müddətli icarə müqavilələri bağlanmalı və həmin maşınlar özəl şirkətlərə verilməlidir. Bunun başqa çıxış yolu yoxdur”.