4 yaşında limonad satışı ilə başlayan uğur hekayəsi - SƏHƏR OXUSU

Dörd yaşlı bir uşağın sadə bir limonad resepti ilə milyonlarla dollarlıq bir biznes imperiyasının əsasını qoyacağına inanmaq çətin ola bilər.

Valyuta.az xəbər verir ki, Texas ştatından olan Mikaila Ulmer bu mümkün olmayanı gerçəkləşdirib.

Onun qurduğu "Me & the Bees Lemonade" brendi bu gün ABŞ-ın iri marketlərində satılır və sosial sahibkarlığın uğurlu nümunəsi sayılır.

Mikaila limonad biznesinə çox erkən yaşda başlayıb.

Nənəsinin 1940-cı illərə aid limonad resepti və öz maraq dairəsi - arılar - onun brendinin təməl daşlarını təşkil edib. Arıların təbiətdəki vacib rolunu anlayan Mikaila, satışdan əldə etdiyi gəlirin bir hissəsini bu canlıların qorunmasına yönəltməklə sosial məsuliyyətli sahibkarlığa nümunə olub.

"Me & the Bees Lemonade" brendi ilk dəfə yerli bazarlarda satılıb. Daha sonra məhsullar "Whole Foods" kimi iri marketlərdə yer aldı. Mikailanın bu uğuru "Shark Tank" teleproqramında investorlar tərəfindən dəstəkləndi və nəticədə milyon dollarlıq investisiya ilə biznesi daha da böyüdü.

Mikailanın biznes modeli yalnız maddi gəlir əldə etməyə deyil, sosial dəyişiklik yaratmağa da yönəlib. Arıların qorunması və ekologiyanın dəstəklənməsi onun əsas prioritetlərindəndir. Bu, onun markasına güvən və dəyər qazandırır, alıcılarda müsbət emosional bağlılıq yaradır.

Maya Hüseynova