Cümə günü ABŞ-nin yeni seçilmiş prezidenti Donald Tramp yeni bir kriptovalyuta təqdim edib. 

Valyuta.Az xəbər verir ki, bu kriptovalyuta demək olar ki, bir saat ərzində 10 milyard dollarlıq bazar dəyərini aşıb.  

Tramp, özünün "Truth Social" və "X" hesablarından yanvarın 10-u axşam saatlarında "$TRUMP" adlı kriptovalyutanı elan edib. Bir saat sonra isə bu kriptovalyuta artıq 10 milyard dollardan çox bazar dəyəri ilə ticarət olunub.

My NEW Official Trump Meme is HERE! It’s time to celebrate everything we stand for: WINNING! Join my very special Trump Community. GET YOUR $TRUMP NOW. Go to //t.co/GX3ZxT5xyq — Have Fun! pic.twitter.com/flIKYyfBrC

— Donald J. Trump (@realDonaldTrump) January 18, 2025

Bir çoxları bu memecoinin kiberhücum nəticəsində yaradıldığını düşünsə də, "Coinage" portalının məlumatına görə, layihənin reklamı Trampın daha əvvəl təqdim etdiyi "NFT" layihələrini dəstəkləyən eyni şirkət tərəfindən edilib.  

Yeni token ilkin olaraq 200 milyon ədəd buraxılıb. Layihə gələcəkdə ümumi token sayının 1 milyarda çatdırılacağını açıqlayıb. Tokenlərin 80%-i yaradıcı komanda və "CIC Digital" şirkəti üçün nəzərdə tutulub. Təqvimə əsasən, komanda üçün ayrılmış tokenlərin heç biri ilk üç ay ərzində sərbəst buraxılmayacaq.  

Tokenin təqdimatı ABŞ Qiymətli Kağızlar və Birja Komissiyasının rəhbəri Qari Genslerin istefası və Trampın bazar ertəsi keçiriləcək inauqurasiyasından cəmi üç gün əvvəl baş tutub.  

Bundan əlavə, Trampın yeni memecoini "Solana"ya müsbət təsir edib.Tokenin təqdimatından sonra "Solana" kriptovalyutasının dəyəri təxminən 6% artıb. Bu, investorların qəfil elan olunmuş tokenə maliyyə yatırması ilə əlaqədardır. Digər tərəfdən, bəzi digər kriptovalyutalar kiçik enişlər yaşayaraq bazar iştirakçılarının diqqətinin dəyişdiyini göstərib.  

Rəhim