"Politico": Aİ Ukraynadan tranzit dayandırıldıqdan sonra Rusiyadan rekord sürətlə qaz alıb

Avropa İttifaqı ölkələri Rusiya qazının Ukrayna ərazisindən tranzitinin dayandırılmasından sonra rekord sürətlə qaz satın alır.

Valyuta.az xəbər verir ki, bu barədə "Politico Europe" qəzeti "Kpler" şirkətinin topladığı statistik məlumatlara istinadən yazır.

"2025-ci ilin ilk 15 günündə Avropa İttifaqının 27 ölkəsi Rusiyadan 837,3 min ton mayeləşdirilmiş təbii qaz idxal edib", deə nəşr qeyd edib.

Müəlliflər qeyd edirlər ki, Avropa ölkələri Rusiyadan alışı azaltmaq üçün kifayət qədər tədbirlər görmür, çünki ötən ilin eyni dövründə Aİ 760,1 min ton maye qaz istehlak edib.

Bundan əvvəl ABŞ dövlət katibinin enerji resursları üzrə köməkçisi Geoffrey Pyatt bəyan etmişdi ki, Ukrayna heç vaxt Rusiya qazının ölkə ərazisindən tranzitini bərpa etməyəcək.

ABŞ rəsmisi deyib ki, Avropa Rusiyanın enerji resurslarından asılılığın sona çatdığını görür. Nəticə ABŞ-ın öz mayeləşdirilmiş təbii qaz (LNG) sənayesində "dramatik artım"dır.

Paşa Məmmədli